Aguero a class, Man City an champion?

Manchester City chuan Inrinni zan khan Crystal Palace 2-0 in an hneh a, striker class Sergio Aguero leh Ferran Torres ten goal an khung. Pep Guardiola hote hian point 80 an hmu a, nizan inkhela Liverpool-in Manchester United an hneh chuan chhiarkawp dan ang thlapin an champion a tih theih ang.

Chutihrualin Old Trafford-ah Ole Gunnar Solskjaer-a hoten point an hlawh chhuak a nih pawhin Man City tan champion nemnghet turin hun rei nghah a ngai dawn tawh lo. Pep-a hote erawh Champions League-ah an insawrbing a ṭul dawn a, May 4, Thawhlehni zan hian Etihad Stadium-ah Paris Saint Germain nen semifinal second leg an khel ang.

Duh lo rual?
Pep Guardiola-a'n PSG nena an inkhel tur thlir chungin Palace hmachhawn tur team a thlang tih a lang a, an chhawr loh player-te an inrawn inlan. Mahse maw! Pep-a player thlante hi Sergio Aguero, Gabriel Jesus, Raheem Sterling, Feran Torres, Benjamin Mendy leh Aymeric Laporte te an la ni nawk.

Tun dinhmuna Man City B-Team tiha sawi theih hi Premier League champion rinkai ni thei tur khawpin an ṭha a, Crystal Palace tan pawh hneh chi rual niin a lang lo. Sterling-a'n chance ṭha a nei hmasa ber a, English forward hian a duh tui luatah goal-ah a chantir lo.

Chutihrualin Christian Benteke goal khung tur keeper Ederson-a dansak erawh a ṭha takzet. First half-ah goal a lut lo a, minute 45 dang a la awm avangin Palace tan Man City chelh tlang erawh a la huphurhawm hle.

Aguero a class
Crystal Palace-in goal venhim hna an thawk a, City tan goal khung a awlsam lo. Second half-ah erawh player class bik Sergio Aguero a rawn inlar. Minute 59-naah Argentine forward hian Benjamin Mendy hnen aṭanga a ball hmuh chu a ke ding lama lain, a ke dinglam bawkin goal-ah a pet nghal.

Aguero hi inhliam vangin tun season-ah a khel tam lo a, Pep Guardiola-a'n a rin tawk loh bawk avangin league match vawi 10 a inlanna chauh a ni. Amaherawhchu kum 32 mi Aguero hian striker ṭha bik a ni tih a pholang a, Manchester City-in Premier League nomawi an chawi hmasak ber ṭuma goal ropui khungtu tho kha a la ni reng.

Minute 59-naah Ferran Torres-a'n Man City goal hnihna a khung zui a, Crystal Palace tan thawhchhuah ngaihna a awm tawh lo. Inkhel thununtu Man City 2-0 in an chak.

Pep-a a lawm
Manchester City manager Pep Guardiola chuan, "Goal ropui, player ṭha bik, pa danglam tak a ni. A rawn kir leh ta hi ka lawm. Man City-a a hun hnuhnung hi nuam ti takin a khel chho ang. A goal hma khan tu nge a nih ṭhin leh tu nge a nih chu a pho lang. Amah hrim hrim hi a ngaina a ni," tiin club legend Aguero a fak.

Spanish manager Guardiola chuan, "Champions League khelh zawh chuan a harsa ṭhin a, amaherawhchu Paris-a inkhel ve loten an theihna an pholang," tiin a sawi. Crystal Palace nena an inkhelh dan hian UCL semifinal second leg-a bul ṭantu tur a thlak danglam phah a rinawm lo a, amaherawhchu goal mamawh dinhmuna an ding a nih chuan Pep-a'n Aguero a luhtir ngam tawh ngei ang.