Pollard-a 'magic' hmangin Mumbai an chak

Inrinni zan khan Indian Premier League-ah inkhel hmuhnawm bik chhawp chhuah a ni a, champion lai Mumbai Indians-in Kieron Pollard-a'n ball 34 leka run 87 a siam zarah Chennai Super Kings chu wicket liin an hneh.

Feroz Shah Kotla-ah Mumbai-in vawm hmasak an thlang a, Chennai-in run 218/4 zet an siam a; Ambati Rayudu (72) Moeen Ali (58) leh Faf du Plessis (50) ten half century an siam vek.

Mumbai tan Chennai target siamsak hi a tam mah mahah a ngaih theih a, opener pahnih Rohit Sharma (35) leh Quinton de Kock (38) te che chhe lo mah se chak nan a tawk lo.

Kieron Pollard rawn lan hnuah Mumbai-in beiseina thar an nei a, Windies batsman hian a ball hmachhawn apiang chu kil tinah a vaw chhuak tih mai tur a ni.

Kum 33 mi Pollard hian ball 34 lekah run 87 zet a siam a, over tawp bera a chet dan hi a ropui zual. Mumbai hian over tawp berah run 16 an la mamawh a, Pollard hian South African bowler Lungi Ngidi lak aṭangin an mamawh zat hi a vaw chhuak a, Mumbai-in over 20-ah 219/6 siamin wicket liin hnehna an chang.

Zirtawpni zanah Punjab Kings (179/5) chuan Royal Challengers Bangalore (145/8) chu run 34-in an hneh. Zanin dar 7:30 hian Narendra Modi Stadium-ah Kolkata Knight Riders leh Royal Challengers Bangalore te an inkhel ang.