Old Trafford-ah Arsenal an 'Partey'

Pierre-Emerick Aubameyang-a penalty hmangin Arsenal chuan Manchester United 1-0 in an hneh. Premier League bikah kum 14 zet a liam hnuin Gunners hi Old Trafford-ah Thomas Partey hoin an 'party' thei ta.

Paul Pogba-a'n ṭul lo taka Hector Bellerin a tihtluk avangin penalty a chawi a, tun hnai match nga chhung goal khung lo captain Auba-a'n keeper David de Gea bumin goal awm chhun a khung.

Sir Alex Ferguson leh Arsene Wenger hunlaia inkhel hmuhnawm min entir ṭhinte khan inkhel hmuhnawm min entir thei lo. Mikel Arteta nauten an chak khâtna khelmualah point thum an hmu a; Ole Gunnar Solskjaer erawh United a enkawl match 100 tlin zanah an tlawm.

Vanglaini October 7, Nilaini chhuakah "Partey hoa 'Party' tum Arsenal" tiin Arsenal-in Spanish club Atletico Madrid aṭanga Partey an lakluh chanchin ziah a ni a, ni 25 a liam hnuah a chhanna pekin kan awm.

Arsenal manager Arteta-a'n tlar-hnung rem phui hmasak a duh avangin an inkhel a hmuhnawm tawk lo ṭhin, a bik takin team lian an tum ṭumin an 'back pass' nasa thei hle. United lakah erawh midfielder Partey leh Mohamed Elneny hmangin inkhel an thunun a, an match hmasa lam aiin hma an sawn.

Willian leh Aubameyang ten rang taka ball inpein hun ṭha an insiam, Brazilian forward hian khung theihna hun nei mah se goal bar a pet per hlauh. Gabon international Auba-a'n Bellerin ball cross chu hnai takah a tlawh hman lo bawk.

Man United tlarhnung an dingnghet viau a, midfielder Pogba leh Bruno Fernandes-te erawhin beisei angin ball an chang thei lo. Marcus Rashford ball pek dawngtu Mason Greenwood-a'n sir deuh aṭangin hun ṭha nei zauh mah se keeper Bernd Leno-a'n a kein a lo dansak.

Hun chanve hma lama khel ṭha zawk Gunners lamin an hun ṭha neih an chhawr ṭangkai thei lo a; Alexandre Lacazette ball pet tur Victor Lindelof-a'n a lo pet persak hman a, rawlthar Bukayo Saka tauh pawh goal zawnah a kal lo.

Solskjaer-a'n United a enkawl aṭanga match 100-naah chak a duh, second half aṭanga khelh dan phung thlakin goal khung tumin an nawr. Midfielder Fred la chhuaka Nemanja Matic a dah luh hnuah hma an sawn hret, goal erawh an keng tel lo.

Serbian international Matic-a'n penalty hlawh chhuak turah inngai mah se, defender khel ṭha tak Gabriel-a'n ball a khawih hmasak avangin penalty pek a ni lo. Brazilian defender hi Arsenal ban rinawm a ni a, chutih rualin hun rilru fim hman a zir belh a la ngai.

Man United goal nawr karah Gunners lamin hun ṭha an hmu zauh, hlauhawm tak nia lang loah Bellerin-a ball chan chu Pogba-a'n a titlu a, a pet fuh avangin penalty pek a ni - Auba tan khung turin harsatna a awm lo.

RB Leipzig laka goal nga khung thei United tlarhma an bil tlat a, striker palian Edinson Cavani leh Donny van de Beek an dahluh hnuah pawh beisei an phak chuang lo; mangan hnua dah luh pahnihte chhawr thei turin midang an insiamrem thei tawh lo.

United hian Nilaini zanah Champions League khel turin Istanbul Basakshir an lenchilh zui dawn a; Pogba leh Fernandes an inkawp chhunzawmtir dawn nge, beisei phak lo France international hi an dah chhuak ngam dawn tih chu hriat châkawm tak a tling.

Arsenal-in hma an sawn a, inrintawkna an nei a, player tharte an rintlak tih a lang. United erawh an boss-in a player tharte a la chhawr mang lo a, player hlui a siksawi kual a, tun season Premier League-ah Old Trafford-ah an la chak miah lo.