Chona hautakin min hmuak - Klopp
Liverpool chuan zanin dar 1:30-ah Champions League group stage match khel turin Atalanta an lenchilh dawn a, Reds manager Jurgen Klopp chuan tun season Europe-a an hmachhawn hautak ber tur a nih thu a sawi.
Klopp chuan, "Aston Villa laka kan tlawm hnuah insiamṭhain hnehna kan chang chho leh tawh a, hetihrual hian season ṭantir chauh a la nih avangin inelna hrang hranga kan dinhmun sawi theih a la ni lo.
"Mahse, chiang taka ka sawi theih erawh zanin kan inkhel tur hi Champions League-a kan tana chona hautak ber tur a ni. Tun hnai kum liam taa Atalanta hnathawh thlir ila, team thawhhona ṭha tak leh hmachhawn harsa tak an ni tih a lang - Leeds United nen an inangin ka hria," a ti.
Liverpool hian season bul ṭanna inkhelah khan Leeds United hi an hmachhawn a, 4-3 in an hneh hram. Tun hnaia goal chhuah nasa tak Liverpool-in goal khung thiam Atalanta an hmachhawn tur hi hmuh a châkawm.
Hliam vanga talbuai mek Liverpool hian Virgil van Dijk leh Fabinho chu an chhawr thei dawn lo chiang a, Thiago Alcantara-a la dam chiang lo bawk. Hetihrual hian midfielder Naby Keita leh Joel Matip-ten training an zawm tawh thung.
Liverpool hian an match hnuhnung berah West Ham chu 2-1 in an hneh a, tlarhnung laiah Joe Gomez leh a vawi khat nana Premier League match khel Nathaniel Phillips an inkawp - an league match hnuhnung bera 2-1 a Crotone hnehtu Atalanta hi Hammers tlarhma ai chuan hmachhawn an hautak zawk ang.
Klopp chuan, "Matip leh Keita-ten training an nei thei tawh a, training theih loh ai chuan a ṭha zawk. Inkhel bul an ṭan ngei dawn tihna erawh a ni lo a, players chhawr theih tur tam tak hruaiin kan zin dawn - thutlukna chu nakina siam tur a ni," a ti.
Liverpool hian match hnih an khelh tawhah hnehna an chan ve ve avangin zaninah hnehna an chan chuan round of 16 lut chiang ang deuhthawa sawi theih an ni dawn a, Atalanta hian match hnihah point li an nei ve tawh tho tih erawh hriat tel a ṭha.
Group D inkhel dangah Ajax chuan zanin dar 1:30-ah FC Midtjylland an lenchilh ve dawn bawk.