Serie A roreltu thar Inter Milan

Inter Milan chu tun hnai kum 11 chhunga a vawi khat nan Serie A champion an ni ve leh ta. A zawna season kua zet champion thei Juventus kut aṭangin Antonio Conte naute hian 'Scudetto' an chhuhsak.

Pathianni zan inkhelah Inter hnaih bertu Atalanta chu Sassuolo nen 1-1 in an inhnehtawk, point hnih an hloh avangin khelh hmabak mach li lai la awmah Nerazzurri chu umphak theih an ni tawh lo.

Kum 2010 khan Jose Mourinho kaihhruaina hnuaiah Inter hian Serie A title an la, a hnu lamah erawh an nghah rei a ngai hle. Tunah Conte hoin hlawhtlinna an chang, Old Lady a enkawl laia vawi thum champion tawh Conte tan Serie A title palina a ni.

Inter thawhlehna
Season hmasa khan pahnihna dinhmun a luah a, champion Juventus an tluk lo. Manager luhlul leh rilru nghet nei Conte-a'n kuminah thapui a thawh a, a tir lamah an chet fuh tawk loh avangin beisei an nei sang ngam chuang lo.

Champions League aṭanga pet chhuah an nih hnuin Europa League-ah an tla bawk. January thla khan Udinese nen 0-0 in an inhnehtawk a, season chanve an hman hian an hmelma leh elpui AC Milan aiin point hnihin an hniam zawk.

Udinese laka goal an khung loh hnuah Inter an harh thar, a hnu lama league match 11 an khelhah hnehna an chang vek–Mourinho hoa an champion kuma an point hmuh zat (82) kha an nihrual tawh, match pali ngawt khelh hmabak an la nei.

Inter an champion hi sawi nep theih a ni lo. A zawna vawi kua ngawt champuin tawh, player ropui Cristiano Ronaldo awmna ni bawk Juve an hliahkhuh thei. Zlatan Ibrahimovic hoa khel AC Milan pawhin an chhaih buai phak lo–Italian team ṭha ber an ni chiang.

Conte-a Inter
Antonio Conte-a'n Juve leh Chelsea a enkawl laiin a naute khelhtir duh dan bik a nei, a kalphung hi Inter-ah pawh a chhawm zel. 3-5-2 formation hmangin a naute a rem a, match 34 aṭanga goal 29 chauh an chhuah chu an chakna hnar pawimawh a ni.

Nipui lai khan Real Madrid aṭangin Achraf Hakimi chu pound maktaduai 36-in a lalut, wing back Hakimi hian goal li a khung bakah assist vawi sarih neiin a ṭangkai hle. Alexis Sanchez leh Christian Eriksen te chawr rim lo mah se hun pawimawhah point an hlawh chhuahpui ṭhin.

Manchester United player hlui Matteo Darmian pawh sawi hmaih theih a ni lo, ani hian tun hnaiah Cagliari leh Hellas Verona lakah goal pawimawh a sual chhuak. Pawimawh ber an awm bik lo a, a sulsutu erawh tlarhma laia ding Romelu Lukaku a ni.

Belgium international hian a kawppui Lautaro Martinez nen league bikah goal 36 an khung tawh, player pahnih hi a inkawp rem avangin Serie A chauh ni loin Europe huap ang pawha tlarhma hlauhawm an tling phak.