Conte a lungawi

A kalna apiangah nomawi a chawi a, atan lawmna tur a ni. Conte chuan, "Team enkawl hna ka thawh china ka hun tawn pawimawh ber zinga mi a ni. A nihna takah chuan Inter zawm tura thutlukna siam kha a awlsam lo, champion mai thei team kha an ni miau lo a.

"Juventus lamin hun rei tak ro an rel a, tunah chuan kum hnih chhung leka thil kan thlak thleng dan leh danglamna kan thlen hi sawi a nuam ta hle. Ka naute hian tunlai football khelh dan tur dik takin an khel chhuak," tiin hlawhtlinna an chan chhan a sawi.

Italian manager hian Inter tan kum khat daih chauh contract a nei tawh, champion lawma an awm laiin a hma hun tur an inrinsiak leh nghal. Conte chuan, "Season tawp hunah kan la sawiho ang, tunah chuan thil hlu bik kan hlawh chhuah hi lawm hun a ni zawk," tiin contract chungchang a sawi.

Juve leh Chelsea manager hlui chuan sawi zawmin, "Ka sawi fo tawh ang khan chak tur chuan tlarhnung phui ringawt a tawk lo a, goal khung hnem ringawt pawh a ni chuang lo. Team inkhairual leh inbuktawk tak neih a ngai ṭhin.

"Season tir lam match 10 vel kha chu inzir nan kan hmang a ni ber, khelh dan phung nghet nei tur khan kan bei rei hle," a ti. Conte naute hian season kal laiah vawi hnih chauh chak loh an nei–January 6 hnu lamah tlawm an nei lo hial.

Andrea Pirlo kaih-hruaina hnuaiah Old Lady an zuih mek a, club lian dang–Napoli, AC Milan leh AS Roma ten beisei an la phak lo. Conte enkawl Inter hi kuminah an champion a ni satliah lo a, season tharah pawh club dang tan umphak an harsa ang.