Etihad Stadium-ah PSG an tho chhuak thei ang em?

Zanin dar 12:30 hian Manchester City leh Paris Saint-Germain ten Etihad Stadium-ah Champions League semifinal second leg an khel dawn. Paris-ah first leg khelh a ni tawh a, Man City-in 2-1 in hnehna an chang.

French champion-in goal hnih tal khung an mamawh tih hrechungin Premier League champion ni mai tur an hmachhawn dawn. Neymar leh Kylian Mbappe kawltu PSG hian Nou Camp-ah pawh goal li an khung thei a, final lut tur zawnna a la hmuhnawm khawp ang.

Mbappe a dam?
PSG goal khung khawl Kylian Mbappe chu kartawpa Parisians-in RC Lens 2-1 a an hneh ṭumin inhliam vangin squad-ah pawh a awm lo. Inkhelh banah Mauricio Pochettino chuan, "Beisei sang tak kan nei. Training-naa a khelh dan thlir ang a, inkhelh hmain thutlukna kan siam ang," tiin Mbappe chungchang a sawi.

First leg-ah Idrissa Gueye hnawhchhuah a nih avangin Senegal international player hi an chhawr thei dawn lo. Gueye thlakna chu an awm mai dawn a, Mbappe erawh thlak a harsa dawn. Hemi a nih avang hian Poch-a'n a ruahmannaah pawh Mbappe hi a tel vek a rinawm a, 100% fitness nei lo pawhin a chhawr lui duh ngei ang.

Paris-ah khan
Second leg bihchian hmain first leg thlirlet hmasak a ṭul. Paris-ah khan PSG an chak lo a, mah se first half-a team ṭha zawk chu Mauricio Pochettino hote an ni. Second half-ah Man City-in inkhel an thunun ta daih a, Pep Guardiola-a'n a hming ṭhat phah hle.

Amaherawhchu Poch-a'n tihsual a neiah an ngai ve bawk. PSG-in City pressure pek an zo lo a, goal venhim tuma an beh tak avangin an che thei lo. Neymar leh Mbappe ten ball ṭha an hmu lo a, City player-te ball inpe kual an thlir a ni ta ber.

Chutihrualin City goal hnih kha vanneih goal tih theih a ni thung. Kevin de Bruyne cross chu goal-ah a lut ta daih a, Riyad Mahrez-a freekick pet pawh wall a pawp avanga goal chauh a ni bawk. Mahse English club-in goal hnih an khung miau avangin Pep Guardiola hote an dinhmun a ṭha a, final luh erawh a la awlsam lo ang.

En châkawm chu
PSG-in kar tawpah RC Lens an hneh a, ṭum dang ang bawkin Neymar a hmuhnawm hle. Brazilian forward hi Etihad Stadium-ah a inthlahrun a rinawm lo a, Mbappe leh Angel di Maria te nen Man City tlarhnung tan ven a awlsam dawn lo.

Second leg hmuhnawmna tur tak erawh Man City tan goal chhuah loh tawk mah se Pep Guardiola-a'n defensive game khel turin risk a la ngam lo ang. Man City ṭum dang ang thoin ball chang tam an tum dawn a, amaherawhchu final luh ngei tum PSG-in risk laa an nawr dawn avangin City player-te tan nuam sa taka ball inpek a harsa tawh ang.

English club tan Ruben Dias a pawimawh dawn a, Portuguese defender ho hian City-in tun season-ah footballer langsar Erling Haaland, Harry Kane, Heung Min Son, Kylian Mbappe leh Neymar te an chelh tawh. Pep-a hian tun season-ah tlarhnung a rem phui ṭha a, PSG hi a fiahna tur a ni thei ang.

Man City manager Pep Guardiola chuan, "Thil thar tih a rem lo, kan khelh ṭhin dan pangngaiin second leg-ah pawh kan khelh a ngai," tiin a sawi. PSG manager Mauricio Pochettino pawhin, "Football-ah chuan rinna leh beiseina kan neih a ngai. Chak kan tum ang a, goal khung kan tum ang. Pressure chu kan ngah zawk ngei a, mah se beiseina la awm chhung chu kan tum ve phawt ang," tiin a sawi.

Argentine manager Poch hian Tottenham a enkawl laiin Guardiola kaihhruai Man City hi Champions League-ah a lo hneh tawh a, chuvangin zanina an khelhna tur hi Etihad Stadium ni mah se a zam nghawt ring suh.