Rajasthan leh Delhi an chak

Pathianni zan Indian Premier League inkhelah Rajasthan Royals-in run 55-in Sunrisers Hyderabad an hneh a, Delhi Capitals-in wicket sarihin Punjab Kings an hneh ve bawk. Zanin dar 7:30 hian Sunrisers Hyderabad leh Mumbai Indians-te an inkhel ang.

Feroz Shah Kotla-ah Sunrisers-in vawm hmasak an thlang. Rajasthan Royals tan Jos Buttler-a'n ball 64 lek aṭangin run 124 zet a siam a, run 220/3 tehmeuh an vaw chhuak.

Sunrisers tan target a tam mah mah a, run 165/8 chauh an siam. Royals tan Mustafizur Rahman (20/3) leh Chris Morris (29/3) ten wicket thum ve ve an la a ni.

Narendra Modi Stadium-ah Delhi-in vawm hmasak an thlang. Punjab Kings tan Mayank Angarwal-a'n thi loin run 99 zet siam mah se thlawptu a neih ṭhat tawk loh avangin run 166/6 chauh an siam.

Delhi Capitals tan target harsa a ni lo a, Shikhar Dhawan-a'n thi loin run 69 a siam a, Prithvi Shaw (39) leh Steve Smith (24) ten siam belh ve bawkin over 17.4 lekah run 167/3 siamin hnehna an chang.