Max hmaah Hmailton a thleng

Formula 1 champion tur a la hriat loh a, nomawi inchuh tur erawh a chiang der tawh. Lewis Hamilton-a'n a elpui Max Verstappen leh Valtteri Bottas tlan pelin Portuguese Grand Prix-ah hnehna a chang.

Mercedes driver Hamilton-a'n record ropui siam tura nomawi humhim ngei a tum, a kawngah Verstappen hneh a ngaih dawn avang erawh chuan a harsa dawn - Bottas pawh sawi bo theih a ni bik dawn lo.

World champion vawi sarih ni tawh Hamilton-a'n duhthusamin bul a ṭan lo, a elpui Verstappen leh Bottas te hnungah a awm. Mahse, lap li an tlan hnuah Red Bull driver a tlan pel a, chumi hnuah a teammate tlan pel lehin intlansiak a thunun chhunzawm.

Kum 36 mi Hamilton chuan, "Rilru leh taksa a hah ngei mai, intlansiak hautak leh ngaihnawm tak chu a ni. Valtteri khan a duh anga ṭhain bul a ṭan bik lo a, a hnuah Max pawhin tihsual a nei ve zeuh zeuh bawk - boruak inlumlet vel kharah ka vannei ber," a ti.

Tun season intlansiak vawi thum an hmachhawn tawhah Hmailton hian ṭum hnih hnehna a chang, a elpui Verstappen hi vawi khat a chak thung. Dutch tlangval Max hi a chak lo zawk a nih ṭum pawhin pahnihna a ni zel a, an inum chho zel dawn tih a chiang.

Kuminah hian intlansiak 23 awm tura ruahman a ni. May 9, Pathianni hian Catalunya tlankawngah Spanish Grand Prix an tlan leh dawn a ni.