A vawi hnih nan Miller a chak

Jack Miller chuan Pathianni zana tlan zawh tak Spanish Grand Prix-ah hnehna a chang a, bike intlansiakna sang berah hian ṭum hnih hnehna a channa a ni nghal chiah bawk.

Australian tlangval Miller hi a Ducati team-mate Francesco Bagnaia hmaah a thleng a, anni pahnih hnungah hian Franco Morbidelli a thleng. Season bul ṭan fuh tak Fabio Quartararo erawhin beisei phak loin 13-na dinhmun a luah.

Portuguese Grand Prix-a hnehna changtu Quartararo-a'n result a neih ṭhat loh avangin championship table lamah pawh a tlahniam, a hmahruaina chu Ducati rider Bagnaia-a'n a rawn khum ta chiah.

Ducati rider Miller chuan, "Ka tan chuan engkim mai kha a nih dan tur ang thlapin a kal. Ka elpuite khan na takin min nawr reng a, kawng kawi vawi khat kual sual zeuhah pawh tlahniam nghal thei ka ni tih ka hre reng, chutiang kara ka chak thei kha ka lawm," a ti.

Jerez tlankawngah hian Marc Marquez pawh a lo kir. Spanish rider hian nikum khan he hmunah hian hliam a tuar a, a tan season a tawp zui bawk; kuminah pawh intlansiak hmasa pahnih a tlan theih loh phah.

Kum khat a liam meuh chuan Marquez pawh a lo dam fel tawh, mahse ngai a la awh leh lo - pakuana dinhmunah a ding a, tun hma lama a theihna sang tak ang kha engtik hunah nge a neih let leh ang, tih hriat a la ni lo.