Barca beiseina chawi nungtu Messi

Granada laka rin loh taka an tlawm hnuin Barcelona an tho lehnghal a, an mikhualna ramah Valencia chu 3-2 in an hneh - champion beiseina an chhi nung ve zel.

Barcelona tan Lionel Messi bawk chu player langsar a ni a, Argentine forward hian goal hnih a khung - Antoine Griezmann chuan Catalan club tan goal khat a khung ve bawk. Valencia tan Gabriel leh Carlos Soler-ten goal khat ve ve an khung ve bawk a, inkhel result thlak danglam tur erawhin a tling tawk lo.

Barcelona-in table-ah pathumna dinhmun an luah chhunzawm a, hmahruaitu Atletico Madrid chu point hnihin an phak lo mek - an league match khelh leh hmasak berah an intawng dawn.

Valencia phawt
Granada laka an chak loh ṭuma hnawhchhuah, Barca boss Ronald Koeman-a'n hrem a nih avangin khelmual sirah a naute a ho thei lo a, assistant coach Alfred Schreuder hoin Barca an inlan.

Valencia-in Granada pawhin an hneh theih Barca hneh lo nih an duh lo a, inkhel ṭantir aṭangin an nawr ve ngam tlat - an beisei ang goal erawh an hmu lawk bik lo.

Goal lut loin chawlhlawk hman a ni a, Barca fans an mangang - an manganna belhchhah turin minute 50-naah goal an chhuah. Corner aṭanga ball kal chu Barca keeper Marc Andre ter-Stegen-a'n a man thei lo a, Thierry Correia nen ball an inchuhna lamah a tlu.

Arsenal defender hlui Gabriel-a'n ball hi lo nang fuhin goal ruakah a tauh lut a, Ter-Stegen tan tih ngaihna a awm tawh lo. Barca an hawihai.

Zero to hero
Goal an chhuah aṭangin minute sarih a liam a, Barcelona-in Valencia left back Toni Lato handball vangin penalty an hlawh chhuak. Pet turin Messi-a lo pen chhuak a, mahse, Barca keeper hlui Jasper Cillessen chuan a dansak.

Mahse, Messi-a vannei - Pedri chuan a per lehlam hi rang takin a lo pet a, Gabriel-a'n goal line aṭangin lo dang hman mah se Messi ke bulah ball a tla leh a, Argentine forward hian a tisual nawn tawh lo.

Minute ruk a liam a, Barca bawk kan hmu nawn. Frenkie de Jong-a ball tauh chu Netherlands tana a khelhpui Cillessen chuan mawi zetin a lo dang a, Griezmann ke bulah tak a tla. French foward hian an goal hnihna ni turin a khung zui.

Barca an phur tulh tulh a, Messi 'magic' hmuhtirin kan awm. Minute 69-naah kum 33 mi forward hian freekick hmangin mawi zetin a khung a, Messi ke aṭanga chhuak awm renga mawi bik a ni - Valencia tan Soler chuan minute 83-naah khung ve leh mah se awmzia a nei zui lo.

Messi & goal
Argentine forward Messi-a'n goal-a khung leh ta a, tun season-a match 44-a khelh aṭangin goal 36-a khung tawh - assist 14-a nei bawk. La Liga bikah match 32 khelin goal 28-a khung tling.

La Liga-ah Messi hian goal khung hnem ber dinhmun a luah mek a, a zawna season nga nan Spanish top flight league top scorer-a nih leh ngei hmel hle - amah hnaih bertu Karim Benzema chuan goal 21 a khung.

Messi-a'n freekick mawi bik hmanga goal-a khung kha tun season-a freekick aṭanga goal thum a khungna chiah a ni - Barca tan freekick aṭanga goal 50-a khungna chiah a ni a, Argentina tan vawi ruk a khung tawh bawk.

Argentine forward hian season khata freekick hmanga goal-a khung hnem ber ṭum chu 2018-19 season khan a tawng a, freekick aṭangin goal riat a khung. 2015/16 (7 goals), 2017/18 (7) leh season hmasa (5) te pawh khan freekick aṭangin a khung nual.

Hmabak chu
Barcelona hian May 8-ah league match an khelh chhunzawm dawn a, hmahruaitu Atletico Madrid an mikhual dawn - he result hian champion tur thui takin a hril ang.

Catalan club coach Koeman chu Granada an hneh loh ṭuma official laka a chet dan avangin match hnih chhung atan hrem a ni a, hremna hi kaltlangpui a nih chuan Atletico lakah pawh a naute a ho thei dawn lo tihna a ni.

Mahse, Valencia nena an inkhelh hmain Dutch coach hian an hremna chu an khinlet tur thu a sawi a, he thu buatsaih a nih thleng hi chuan hremna chungchangah thuthar a awm lo.

La Liga-ah match li chiah khelh tur a awm tawh a, Barca hi pahnihna Real nen an point hmuh zat a inang - chutihrual chuan head-to-head ah Real an phak lo a, pathumnaah an awm phah.