Arsenal leh Auba an nui ve leh ta

Pierre-Emerick Aubame-yang-a’n malaria a kai hnua inkhel bul a ṭanna hmasa berah goal a khung a, midfielder Mohamed Elneny khung tur siamsak bawkin Arsenal chuan Newcastle United 2-0 in an hneh.

Pathianni zan St James’ Park-a Premier League inkhelah Elneny-a‘n hla deuh tak aṭangin minute rukna lekah goal hmahruai a pet lut a, second half-ah Auba-a‘n Gabriel Martinelli-a cross chu sang taka a ke khai chungin a tlawh goal.

Mikel Arteta naute hian league lamah beisei an nei tawh lo, season kal laia an beisei awmchhun chu Europa League a ni. Villarreal lakah 2-1 in an hniam mek - Ningani zanah second leg an khel dawn a, final luh beiseina an la nei.

Gunners tan Magpies hneh hi Spanish club hmachhawn tura inbuatsaihna ṭha tak a ni. Berd Leno aiawhtu keeper Mathew Ryan a khel ṭha a, Australian player hi khel ṭha mah se Villarreal lakah erawh Leno a inlan a rinawm.

Gunners manager Arteta chuan, “Kan duh chu kan hmu, mamawh zat goal kan khung bakah tlarhnung kan venghim ṭha. Player tin an khel ṭha a, chu chuan team tan rah ṭha a chhuah niin ka hria.

“Damlohna vangin Aubameyang kan chawr thei lo reng a, tun hnaiah a ṭhat dan angin a khel chhuak thei leh ta hi ka lawm. Tun ṭuma hnehna kan chan hian kan match khelh leh tur atan inrintawkna min pe ngei ang,” a ti.

Gabon tana a feh chhuahna lamah Auba hian malaria a kai, enkawl a nih hnuah a dam tawh. Villarreal nen an intawn hmasa ṭum khan hun tawp dawnah luhtir a ni a, league-ah erawh bul a ṭan thei tawh - Europa League second leg-ah chuan a bul aṭangin a khel tawh ang.