Bale kan hmu leh ta

Tottenham Hotspur Stadium-ah Jose Mourinho hote point hloh thei dinhmunah an ding a, London club tan Harry Kane leh Son Heung-Min te a tawk lo. Minute 70-naah Gareth Bale a lut a, minute thum hnuah Welsh forward hian chakna goal a tauh lut nghal.

Pathianni zan Premier League inkhelah Tottenham-in Brighton & Hove Albion 2-1 in an hneh a, table-ah pahnihnaah an invawrhchho bawk. Bale, Kane leh Son awmna team-in Liverpool chiah an phak lo.

Football ngainatuten Spurs leh Bale inkungkaihna thukzia an hre vek. White Hart Lane la sak ṭhat hma khan wing back naran kha forward ṭha miah an chher a, khawvel player manto ber ni turin Real Madrid pansan mah se Spurs ṭantuten an la hmangaih reng.

Bale-a'n Real a hlawhtlinpui nachungin Los Blancos lamin hmuh pawimawh an chantir lo a, Zinedine Zidane-a hnuaiah khelhna hmun a chan hmel chuang loh avangin loan-in Spurs-ah a kir. 

Inhliam vangin Bale-a'n season a ṭan tlai a, West Ham nen an inkhelh ṭumin bench aṭangin a lut a, bul a ṭan fuh lo. Spurs-in 3-0 in hma hruai hman mah se Bale-a luh hnuah Hammers-in an sut zo vek. 

Spurs-in Europa League-ah Antwerp an hneh lo a, bul ṭantu zingah Bale telin Mourinho-a'n second half-ah a thlak. Portuguese manager hian inkhelh banah, "Theih chu ni se player 11 kha thlak vek ka duh," tiin a sawi hial. Spurs boss hian, "Bale hi kum 2013-a Real Madrid pan ta kha a ni tawh lo," tiin a sawi a, Welsh forward laka 'pressure' tam tak a lak kiansak.

Pathianni zan inkhelah Harry Kane-a'n sawi hlawh taka a penalty hlawhchhuah chu minute 13-naah a khung a, Brighton-in Tariq Lamptey hmangin minute 56-naah an sut. Spurs tan Erik Lamela leh Kane ten chance ṭha an hlah a, Mourinho-a'n Real Madrid tana a enkawl ṭhin Bale a luhtir.

Minute 73-naah Sergio Reguilon-a cross chu Bale-a'n ṭha zetin a tauh lut a, May 2013 hnua Spurs tana a goal khung lehna hmasa ber a ni a, chakna goal a ni zui bawk. Mak ang reng tak chu tunkar tawp khan Real Madrid-in chhuang taka an sawi ṭhin 'BBC - Benzema, Bale leh Cristiano' ten goal an khung vek.

Tottenham boss Jose Mourinho chuan, "Goal kan mamawh a, vawi tam tak Bale-a'n hma a sawn thu ka sawi bawk. Premier League-a minute 90 khel turin la tlin rih lo mah se a finna leh tawnhriat hi chakpui tham a tling. Fans tan pawh Brighton kan hneh hi a hlu khawp ang, a chhan chu chakna goal khungtu Bale hi an ngaina tlat," tiin Bale a fak.

A club hlui Real Madrid kap zuiin Mourinho chuan, "Hun awl ka neih veleh Real Madrid website ka en ang a, a chanchin an sawi dan ka thlir ang," tiin a sawi. Nimin tlai thleng kha chuan Los Blancos hian an club website-ah Bale-a chungchang hi an ziak lo.