Bale-a‘n hattrick a siam

Gareth Bale chuan a la chuai lo tih a pholang leh ta - Tottenham Hotspur forward hian Pathianni zan khan Sheffield United lakah goal thum a khung a, a team chu 4-0 in hnehna a chanpui.

Son Heung-Min chuan Champions League khel lo tur chuan a uiawm tih pholangin goal ‚cial bik a khung ve bawk a, assist vawi khat neiin a goal khung pakhat chu offside vanga pawm a ni lo bawk.

Spurs-in Championship lama tla chiang tawh Sheffield lakah zahngaihna an lantir lo - Bale chuan minute 36-na lekah goal hmahruai a khung a, he goal luh theih nana Serge Aurier-a assist a ṭhat tluk zetin Bale-a‘n keeper Aaron Ramsdale-a pet khum dan a mawi hle.

First half-ah goal dang a lut lo a, chawlhlawk hman hnuah pawh Bale-a 'show' bawk kan hmu nawn -Welsh forward hian minute 61-na leh 69-naah goal a khung leh a, goal 'class' huang chhunga dah ngam vek a ni.

December 2012 khan Bale hian Premier League-a a vawi khat nan Aston Villa lakah hattrick-a lo siam tawh a, Sheffield laka goal thum a khung hi hemi hnua English top flight league-a hattrick-a siam leh hmasak ber a ni.

Bale chuan, “Chance pek kan nih chuan kan chhawr tur a ni. Inkhelh tam ka mamawh a, ka mamawh ang ngeiin ka inkhel tam ta bawk. Hei vang hian ka hlim em em a, ka hlim chuan ka khel ṭha ṭhin a ni,” a ti!

Real Madrid aṭanga Spurs-in loan-a an hawh Bale hian tun season inelna hrang hrangah match 30-a khel tling ta a, hetih chhung hian goal 14 khungin assist vawi thum a nei bawk.

Bale hian coach lailawk Ryan Mason-a hnuaia league match hnih an khelhah bul a ṭan ve ve a, goal li a khung - a pu rinna a ti hlawhchham lo.

Mason chuan, “Bale hian goal hmaa a hlauhawmna leh thiam bikna hi a hloh mai dawn lo tiin ka sawi fo tawh. World Class player-a ni a, chu chu vawi tam a lo pholang tawh ṭhin,” a ti a, Welsh forward hma hun chu season tawpah chauh sawi tur a nih thu a sawi bawk.

Mourinho hnuaia hmun chang phak lo Dele Alli pawhin inkhel bul a ṭan a, first half-a khelh dan en chuan Portuguese manager-in a duh loh chhan hriatthiam a har - second half erawh chhuan tur a tam lo.

Son Heung-Min hming lam hmaih a thiang lo - South Korean striker hian tun season inelna hrang hrangah match 47 khelin goal 21-a khung a, assist vawi 17-a nei bawk.

Spurs-in hnehna an chan avangin season thara Champions League khelh beiseina a nung thar a, nizana Liverpool leh Manchester United inkhel tur sawn a nih tak bawk avangin table-ah panganaah an chho - palina Blues chu point ngain an phak lo mek.