Muchova hneh loin Osaka a tla

Naomi Osaka tan clay court chunga tennis khelh chu thil awlsam a la ni lo. Madrid Open khelh laiah Osaka hi Karolina Muchova lakah a chak lo a, second round paltlang zo loin a zinkawng a tawp.

Pathianni zan inkhelah seeded pahnihna Osaka hian nidanga a service na tak ang kha a nei thei lo, a khingpui lakah hian 6-4, 3-6, 6-1 in a tlawm. Clay court-a title a lak loh record chhe tak chu a la chhunzawm dawn tihna a ni.

Osaka hnehtu Muchova hian a match lehpekah chuan Maria Sakkari a hmachhawn leh ang. Seeded 16-na Sakkari hian inkhel dangah Anett Kontaveit chu 6-3, 6-1 in a lo hneh ve thung.

Japanese nula Osaka hian Grand Slam title ringawt pawh pali a la tawh. Mahse, clay leh grass court-ah a hlawhtling thei lo, kuminah hmasawn a tum viau a, a match hmasa berah khel ṭha mah se season dang ang bawkin a zuih.

Tun thla tawp hian clay court inelna lian French Open an khel dawn a, July thlaah Wimbledon an khel bawk ang - Osaka tan insiamṭhatna hun a la awma ngaih a ni.