Man United ṭantuten lungawi lohna lantir vangin Man United leh Liverpool inkhel an ṭhulh

Football ngainatute Pathianni zana Manchester United leh Liverpool inkhel thlir tumin TV hmaah an ṭhu ṭhup a, thil danglam an hmu. Premier League history-a a vawi khat nan supporter-te lungawi lohna an lantir avangin inkhelh an ṭhulh.

Thil thlen dan
Man United leh Liverpool inkhelh hun hi Pathianni zan dar 9:00 a ni a, amaherawhchu khawvelin a en châk inkhel hi Man United ṭantuten remchangah lain club neitu Glazer-te chhungkua duh lohna lantirna hun atan an hmang.

Old Trafford kawtah supporter 100 chuang an pungkhawm a, mi 200 bawr vel chu stadium chhungah an lut ve bawk. Supporter ṭhahnem takin kawr hring leh eng an hak bakah halmawi khu hring leh eng an hal.

Man United hi kum 1878-a din a nih khan Newton Heath tih a ni a, an kawr rawng chu a hring leh a eng a ni. Kum 2005 khan Glazer chhungkuain Man United hi an lei a, American chhungkua kaihhruaina hnuaiah club-in ba a neih chhoh avangin Man United ṭantute hian an ho hle. Club ṭantute ngaihdanah chuan Glazers chhungkua hian Man United hi sum dawnna atan an hmangah an ngai a, an pai dam thei lo.

Kum 2010 khan Man United ṭantuten Glazer chhungkua duh lohna hi mumal takin an lantir tawh a, hemi ṭum hian rawng hring leh eng tho hi duh lohna lantir nan an hmang. Tun ṭuma Glazer chhungkua chunga duh lohna lantir leh chiam chhan hi European Super League vang a ni a, a hmaa an thinrim tawhna nen an puak keh a ni ber.

Club neitu Joel Glazer-a'n ngaihdam a dil tawh bakah United chief executive Ed Woodward-a'n ESL an thar thawh tawh loh tur thu tichiang mah se supporter-te hian an ngaidam thei lo. United ṭantute hi player-te thlenna Lowry Hotel kawtah pawh an pung khawm a, chutihrualin Man United leh Liverpool ten an thlenna hotel an chhuahsan lo hrim hrim.

Ṭhulh a ngai
Man United ṭantute hian tharum an thawh tel a, Police nen pawh nasa taka an intihbuai avangin inkhelh hi kaltlangpui theih a ni ta lo. Greater Manchester Police (GMP) chuan, "Lungawi lohna lantirtu tam zawk khan muanna nena an thil tum tih hlawhtling kha an tum lo tih kha a chiang vat a, halmawi leh bottle hmangin police an vawm. Police pahnih phei chu damdawi inah hruai an ngai hial," tiin an sawi a, United staff ṭhenkhat pawh room-ah an inkalh khum a ngaih phah bawk.

Manchester United chuan, "Kan club ṭantute hian Manchester United hi an hmangaih a, an ngaihdan leh an thlirna an lanchhuahtir hi a thiang a ni. Chutihrualin inkhelh ṭhulh phah a ngai a, team-in harsatna an tawk a, supporter ṭhenkhat, staff leh police te dinhmun a hlauhthawn awma an siam hi a pawi kan ti. Police-te thlawpnaah kan lawm a, thil awm dan an chhui kawngah pawh theihtawp kan chhuah ang," tiin thuchhuah an siam.

Engtin zel?
Man United leh Liverpool inkhelh hun tih chian a la ni lo. Pathianni zana an inkhelh tak loh avangin champion thei dinhmuna ding Manchester City pawhin pakhatna dinhmun tichiang turin an la nghah rih a ṭul dawn.

Ole Gunnar Solskjaer-a hote hian May 7, Ningani zanah AS Roma nen Europa League semifinal an khel dawn a, tuna boruak ṭha lo hian team chhungah nghawng lian tham a neih a rinawm loh. Chutihrualin captain Harry Maguire, Bruno Fernandes, Nemanja Matic leh Scott McTominay ten supporter lungawi lote hmachhawn an duh a, club-in an phal loh avangin an lungawi lo tih sawi a awm.

Club neitu Glazer chhungkua te erawh tuna thil thleng avang hian an inngaihtuah ṭhat a ṭul dawn a, chutihrualin tun dinhmuna a lan dan chuan club neitu nihna midang tana ken a, Manchester United hi an zawrh mai a la rinawm loh hle.