Rangers-in Celtic an nau en

Scottish Premier-ship-a champion chiang tawh Rangers-in tlawm nei loa league nomawi chawi turin kawng dik an zawh zel a, Pathianni zan khan Old Firm derby-ah Celtic chu 4-1 ngawtin an sawp.

Rangers tan Kemar Roofe-a‘n minute 26-na lekah goal hmahruai a khung a, Roofe-a‘n goal-a khung hma chiah hian Celtic midfielder Callum McGregor chu Glen Kamara lakah a foul a, Rangers-in an goal khung an lawm laiin a yellow card pahnihna pek a ni.

Celtic-in goal an chhuah rualin player pakhat an chan tel nghal a, Odsonne Edouard chuan minute li hnu lawkah an si phurh rawn sut mah se Rangers thinrim an tuar zo lo.

Steven Gerrard-a enkawl team tan Alfredo Morelos leh Roofe-ten goal khat ve ve an rawn khung leh a, kum 38 mi Jermain Defoe chuan hun pek belhah goal khat a belhchhah ve leh bawk.

Scottish Premiership-ah match hnih chiah khelh tur a awm tawh a, tun season league-a Old Firm derby match thuma chak vek Rangers hian tlawm an la nei lo - an hmabak match hnihah an tlawm loh chuan 2016-17 season-a Celtic-in tlawm nei loa league nomawi an lo chawi tawh record chu an nihrual dawn a ni.