Everton mumang a tawp ṭan

Premier League-ah hmahruaitu hial niin season bul duhawm takin ṭan mah se Everton tan a tak ram a inlar chho ṭan a, Newcastle United khelmualah 2-1 in an tlawm. 

Newcastle tan Callum Wilson-a'n a season duhawm hman a chhunzawm zel a, goal hnih a khung - a goal hmasa zawk hi ama penalty hlawhchhuah a khung a ni.

 

Minute 84-naah Wilson-a'n an goal hnihna a khung leh a, tun season-ah Magpies tan league match sarihah goal ruk khungin assist vawi khat a nei tawh. 

Everton tan Dominic Calvert-Lewin chuan hun pek belhah goal khung ve mah se Merseyside club tan comeback-na hun a awm tawh lo a, English striker tan erawh tun season inelna hrang hranga match kua a khelha goal 11-a khung tlinna a ni ta. 

Toffees-in hrem vanga inlan thei lo forward Richarlison leh inhliam playmaker James Rodrig-uez an chhawr thei lo a, an player ṭha pahnih tel loin tlarhma an hriam tawk lo - goal chhuah belh thei hial an ni zawk. 

Magpies tana Sean Longstaff shot ṭha zet chu AS Roma aṭanga loan hmanga an hawh Robin Olsen chuan ṭha zetin a dang a, Swedish goalkeeper hi tun hnaia chesual ngun tak goal-keeper Jordan Pickford aiah luhtir a ni. 

Everton hian an league match hmasa paliah hnehna an chan hnuin vanneihthlak takin Liverpool an inhneh-tawkpui a, Southampton leh Newcastle lakah a zawnin an tlawm zui.