Jerry goal khung zanah Odisha chak

Indian Super League-ah Jerry Mawihmingthanga'n a season duhawm hman a chhunzawm zel a, Chanmari tlangval hian Odisha FC tan Vinit Rai nen goal khungin Chennaiyin FC chu 2-0 in an hneh.

 

Emerging Player of the Match-a Jerry-a thlan a nih zanah Chennaiyin hian penalty hlawh chhuak mah se Nerijus Valskis chuan goal-ah a chantir thei lo a, minute 37-naah Jerry-a'n goal rawn khung zuiin Chennai club an tho tawh lo. 

Odisha tan Daniel Lalhlimpuia chuan Jerry hi minute 82-naah a rawn thlak a, hliam vanga hun rei tak a chawlh hnuah Lalchhuanmawia Fanai pawh bench-ah hmuh turin a awm ve leh ta.

Chennaiyin tan Jerry Lalrinzuala, Laldinliana Renthlei leh Lallianzuala Chhangte ten inkhel bul an ṭan vek a, mahse English coach lar Owen Coyle enkawlna hnuaiah hnehna an chang zo lo. Nizan ISL-ah inkhel a awm lo a, zanin dar 7:30 hian FC Goa chuan NorthEast United an mikhual dawn thung.