Mumbai kutah Kolkata an innghat

Zanin hian Indian Premier League playoff khel tur a chiang dawn. League round match tawp berah Sunrisers Hyderabad leh Mumbai Indians te zanin dar 7:30 hian an khel ang. Sunrisers Hyderabad-in hnehna an chan chuan playoff an khel ang a, an chak lo a nih erawh chuan Kolkata Knight Riders-in knockout round an khel thung ang.

November 1, Pathianni tlai khan Chennai Super Kings-in Kings XI Punjab wicket 9-in an hneh a, playoff khel thei tawh lo Chennai-in Punjab beiseina a ti tawp. Zan lamah Kolkata Knight Riders-in playoff beiseina chhi nung turin Rajasthan Royals chu run 60-in an sawp bawk.

Kings XI Punjab-in match nga an chak loh hnuah a zawn thoin vawi nga an chak a, playoff beiseina an neih phah. Amaherawhchu Punjab-in Rajasthan Royals an hneh loh avangin an match tawp berah tla tawh Chennai Super Kings an hneh ngei a ṭul.

Abu Dhabi-ah Chennai-in vawm hmasak an thlang a, Kings XI Punjab-in over 20-ah run 153/6 chauh an siam. KL Rahul (29), Mayank Agarwal (26) leh Chris Gayle (12) te che ṭha tawk lo mah se Deepak Hooda-a'n ball 30 lekah run 62 a vaw chhuak a, beiseina an neih phah.

Super Kings chet ṭhat ṭum a thleng a, an match hnuhnung bera Knight Riders an hneh ṭuma player of the match Ruturaj Gaikwad-a'n ball 49 lekah thi loin run 62 a siam. Batsman dang Faf du Plessis (48) leh Ambati Rayudu (30*) te an che ṭha bawk a, ball sarih dah bangin run 154/1 an siam a, hnehna an chang. Punjab an chesual nawn a, playoff beiseina a tawp nghal.

Dubai International Stadium-ah Rajasthan-in vawm hmasak an thlang a, Kolkata Knight Riders bat hmasain an che ṭha. Nitish Rana, Sunil Narine leh Dinesh Karthik te duck out mah se Shubman Gill (36), Rahul Tripathi (39) leh Eoin Morgan (68*) te zarah run 191/7 an siam a, chakpui tham a tling.

Rajasthan-in chak tumin bul ṭan ṭha thaw khat mah se wicket an hloh hma an tuar a, tho chuak tur an awm lo. Over li lekah Rajasthan-in wicket li an hloh tawh a, chak tur a chiang.

Kolkata bowler Pat Cummins-a'n run 34 siamin wicket li a la a, Rajasthan-in run 131/9 chauhin an chhanglet. Knight Riders-in run 60-in hnehna an chang. 

Inkhel pawimawh

Sharjah Cricket Stadium-ah zanin dar 7:30-ah Sunrisers Hyderabad leh Mumbai Indians te an inkhel dawn a, cricket ngainatuten an en ṭhap ang. Indians-in pakhatna dinhmun an hauh tawh a, qualifier 1 an khel chiang tawh. Amaherawhchu Sunrisers hi tun dinhmunah panganaah an awm a, an chak chauhin playoff an khel dawn.

Sunrisers hi an chak a nih chuan Kolkata-in playoff an khel dawn lo tihna a ni a, Knight Riders tan pawh inkhel pawimawh a ni. Team pahnih hi an intawn hmasak ṭumin Mumbai Indians hi run 34-in an chak a, result ngai thlen nawn se tih hi Kolkata duhthusam a ni ang.