ATP Finals kaltlangpui tumATP Finals kaltlangpui tum

Mipa tennis thiam zual pariat inelna ATP Finals 2020 chu a hmuna entu awm loin kaltlangpui an la tum zel a, inelna neihna tur ram Britain inkharkhip mah se inbuatsaihna an nei chhunzawm zel.

British Prime Minister Boris Johnson chuan December 2 thlengin an ramah inkharkhip a puang a, ram chhungah mipui punkhawm phal a ni lo. Infiamna ṭhenkhat erawh a hmuna entu awm loin kaltlang pui tho tur a ni ang.

ATP Finals hi November 15-22 chhung hian O2 Arena-ah khelh a ni dawn a, player inlan tur erawh a la chiang vek lo. Roger Federer chu hliam vanga tel thei lo tur langsar a ni.

World number 1 Novak Djokovic leh number 2 Rafael Nadal bakah Stefanos Tsitsipas, Dominic Thiem, Alexander Zverev leh Daniil Medvedev te chu inlan thei tura dinhmun chiang tawh an ni a, hmunruak hnawh khah tur pahnih a la awm.