Chelsea vs Real Madrid Stamford Bridge a chim dawn nge a ding nghet dawn?

Covid-19 hri leng karah football hmuhnawm en tur a awm reng a, zaninah pawh football fan-te an vannei leh dawn. Zanin dar 12:30 hian Champions League semifinal second leg-ah Chelsea chuan Real Madrid an mikhual dawn.

Stamford Bridge-a team pahnih intawng tur hi a hmuhnawm ang tih a chiang a, first leg-a 1-1 a an lo inhnehtawk tawhna hi inkhel hmuhnawmna belhchhah tur a ni ang. Chelsea-in goal an chhuah loh chuan away goal rule hmangin an tlang nghal thei dawn a, Real tan final lut turin goal khung ngei ngei a ngai thung - heti ringawt pawh hian inkhel a hmuhnawm dawn tih a chiang.

Blues hian Real nen first leg-a an inhnehtawk hnuah league match khelin Fulham chu 2-0 in an hneh a, Real-in 2-0 in La Liga-ah Osasuna an hneh thung. Team pahnih phur vanglai tak a ni a, an inhlau lo ang.

Ramos kir lehna
Real Madrid-in Stamford Bridge an pan hmain chanchin lawmawm an nei a, defender pahnih Ferland Mendy leh Sergio Ramos-te chuan pangngai takin training an zawm leh tawh.

A bik takin Ramos lo kir leh ta hi Real tan chuan malsawmna a ni a, kum 35 mi defender tawnhriat ringawt hi thlamuanpui tham a ni - Champions League-ah vawi li a champion tawh a, Chelsea (1) aiin a champion hnem zawk!

Hetihruala hriat tel tur chu January thla lawihawl hnuah Ramos hian hliam leh Covid-19 vangin minute 125 chiah khelmualah hun a la hmang a, Blues laka minute 90 khel tur chuan rin a harsa mai thei.

Osasuna laka hliam vanga lakchhuah ngai Raphael Varane chu Chelsea lakah hian a inlan theih loh tur thu Real chuan an tichiang tawh bawk a, hetihlai hian Madrid assembly inthlan duty tura ruat Marcelo chu a duty pui tur nu pakhatin a hnathawh tur a lo thawhsak dawn avangin Chelsea-a hmachhawn thei dawn.

Chelsea an dam
London club-in Mateo Kovacic an chhawr thei dawn lo chiang tih loh chu player inhliam na an nei lo a, Fulham laka hliam tenau nei Mason Mount chu inlan thei tura beisei a ni a, Antonio Rudiger tan pawh a hliam tenauin harsatna a thlen lo tura ngaih a ni.

Blues tan midfield-ah N'Golo Kanté leh Jorginho an pawimawh leh dawn tih a chiang a, anni pahnih hi an khelh ṭhat phawt chuan Real inkhel khaikhawmtu Toni Kroos, Casemiro leh Luka Modric-te tan chet lak a harsa ang.

Tlarhmaah tun season inelna hrang hranga match 41-a khelh aṭanga goal 28 khung tawh Karim Benzema chu Real tan goal khung khawl a ni a, ani ven dan tur hi Blues-in an ngaihtuah a ṭul dawn a, a khelh ṭhat nia dan harsa tak Vinicius Jr. a la awm bawk.

Chelsea-in goal an nawr dan tur hi hriat a châkawm. Mount chu a lai aṭanga nawr tura a luh a rinawm a, Timo Werner, Kai Havertz leh Christian Pulisic zinga pakhat chu bench-ah an awm a ngai ang - Pulisic hian first leg-ah goal-a khung tih hriat a ṭha a, Havertz hi Fulham laka goal hnih khung zo hlim a ni.

Hei le Hazard
Chelsea fan-te tana en hrehawm tur chu Eden Hazard lo kir tur hi a ni - Blues legend hian Stamford Bridge-ah team dang jersey a ha tawh dawn a, London fans ruhkawl tan chuan hriatthiam a harsa ang.

Hazard hian Blues tan season sarih a khel hman a, hetih chhung hian match 352-ah goal 110 khungin assist 92-a nei a, European football-a player 'hot' ber pawl a ni hman.

Kum 2019-ah a hmangaih hmasa bansanin, pound maktaduai 150 thlenga a man sang chho thei turin Real-a pan zui a, mahse, Madrid khawpuiah erawh mikhual inthlahrung ang mai a ni.

Hazard hian Real-a pan hnuah match 39 khelin goal li chiah a la khung a, assist vawi sarih a nei - a career uai thla lam tawh chhanhim turin amah siam liantu laka hming chher a tum ang. Theihnghilh loh tur chu keeper Thibaut Courtois hi Chelsea tana hming lo chher tawh a ni bawk.

Nomawi duhtu
Champions League specialist ang hiala sawi Zinedine Zidane-a'n CL bakah La Liga a la beisei bawk a, French manager hian nomawi chawi theih ang apiang chawi a duh.

Osasuna an hneh hnu lawkah Zidane chuan, "Nomawi kan chawi vek dawn tiin ka sawi thei lo a, mahse, champion tura tih tur ngai chu kan ti zel ang," tiin La Liga leh Champions League-a nomawi chawi an tum thu a sawi a, zaninah chak tumin an khel ang.

Chelsea boss Thomas Tuchel chuan, "Ramos-a awm tawh dawn avangin kan tan chuan chona thar a ni a, ani hian an tana harsatna kan chhawp apiang vai kiang turin theihna a nei," a ti.

Season hmasa CL final-a Paris Saint-Germain hruai thlengtu chuan sawi zawmin, "Tu nge ṭha zawk a, tu nge kaltluang zawk chu kan hre thuai dawn a, kan khelh dan tur pawh kan hre thuai ang. Real khelh dan tur kan hre lo a, tuna hriat kan mamawh hek lo - inkhelh zanah kan hriat chuan a tawk mai e," a ti a, a inringtawk hle.

"Madrid-a 1-1 a chak kha result ṭha a ni a, phur takin second leg kan hmachhawn dawn - kan hna erawh kan la zo lo." - Christian Pulisic, Chelsea forward

"Final lut turin kan dinhmun a la ṭha reng a, hnehna chan inbeisei chungin London khawpui kan pan ang." - Zinedine Zidane, Real Madrid manager