Henry-a'n Daniel Ek a thlawp

Thierry Henry chuan Arsenal lei tumtu Daniel Ek a thlawp a, Spotify hmuchhuaktu hian Arsenal chu tun hma lam an ropuina ang kha neih let leh pui a tum niin a hria.

European Super League thawm a awm hnuah Arsenal fan-ten club neitu Stan Kroenke an duh loh thu an tlangau pui a, fans leh club neitu inkara boruak ṭha lo a awm lai tak hian Daniel Ek chuan club lei a rawn tum ve mek bawk.

Henry chuan, "Arsenal thisen leh nihna dik tak ang kha phawrh chhuah leh a duh. Daniel hi Arsenal ṭantu a ni a, hmingṭhat leh lar khelh vanga club lei duh a ni lo, hun rei tak chhung ṭha taka club a kal theih nan neitu nih a duh," a ti.

Daniel hian Gunners player pawimawh tak tak lo ni ṭhin tawhte chu thawhho puiah a sawm a, a sawm hlawhtling. Club lei tur erawh chuan American sumdawng hausa lungawina zat sum a thawh chhuah ngam a ngai dawn.