Roma manager Fonseca a chhuak dawn

Nimin khan AS Roma chuan season tawpah manager Paulo Fonseca a chhuah tur thu an puang. Kum 48 mi Fonseca chuan kum 2018 nipui khan Shakhtar Donetsk aṭangin Roma hi a zawm a, Ukrainian club-ah hian season thum chhungin league leh cup-ah a champion vek.

Fonseca hian Roma-ah kum hnih daih contract a ziak a, tuna an result a ṭhat tak loh avangin a contract hi pawhseisak a ni dawn lo. Roma hian Serie A match hnuhnung panga aṭangin point li chauh an hmu a, Europa League quarterfinal first leg-ah Manchester United 6-2 zetin an hneh lo bawk.

Roma president Dan Friedkin chuan, "AS Roma aiawhin Paulo Fonseca hi a thawhrimna leh hruaitu a nihnaah lawmthu kan sawi duh. Covid-19 buaina karah hun harsa tak min kaltlangpui a, a theihna sang tak avangin khawi hmunah pawh kal se a hlawhtling ang tih ka beisei tlat a ni," tiin a sawi.

Fonseca chuan, "Hun hlimawm leh hrehawm kan paltlang a, Rome khaw mipuite min duhsaknaah ka lawm. Tun season khelh hma bakah match pawimawh tak tak a la awm a, kan theihna zawng zawng kan chhuah chhunzawm ang," tiin ṭha taka season khar a duh thu a sawi.

Roma tan Manchester United lehthala Europa League final luh a harsa dawn a, amaherawhchu Italian club ṭantuten an chak zo lo a nih pawhin mualpho nawn an duh lo ang. Serie A lamah Roma hi pasarihnaah an awm mek a, an chung chiaha awm Lazio aia point kuaa an hmuh tlem avangin hmasawn a har tawh ang.