Covid-19 vangin IPL 2021 titawp rih

Nimin chawhma khan online meeting hmangin Indian Premier League Governing Council (IPL GC) leh Board of Control for Cricket in India (BCCI) ten IPL 2021 kal zel dan tur an rel a, Covid-19 vanga titawp rih turin thutlukna an siam.

Thutlukna siam tura mi pakua ṭhukhawm zingah Cricket Association of Mizoram secretary Mamon Majumder pawh a tel. IPL Governing Council member Mamon chuan, "Uluk takin kan ngaihtuah a, mihring nunna kan ngai pawimawh hmasa ber. IPL khel zingah positive an awm tak avangin IPL titawp rih tura thutlukna siam hi a ngai ta a ni," tiin Vanglaini a hrilh.

Thil thlen dan
Kolkata Knight Riders player pahnih Varun Chakravarthy leh Sandeep Warrier te chu Thawhṭanni khan an positive tih hriatchhuah a ni a, kum 29 mi Chakravarthy hi a dar na avanga scan tih a mamawh avangin bio bubble hi a chhuahsan a, hei hi a kaina chhana ngaih a ni.

Amaherawhchu KKR player pahnihin an kai hnu hian Sunrisers Hyderabad wicket-keeper batsman Wriddhiman Saha, Delhi Capitals spinner Amit Mishra bakah Chennai bowling coach L Balaji te an positive tih an hre chhuak. Bio bubble chhunga awm IPL player-te pawh an him tak loah chuan cricket thuneituten thutlukna harsa tak an siam a ṭul phah a ni.

IPL chuan, "BCCI chuan IPL-a inhnamhnawih zawng zawng player, staff leh inelna buaipuitute himna aia ngaih pawimawh hi kan nei lo. India-in hun harsa a tawh kara hlimna leh beiseina siamtu nih kan duh a, amaherawhchu tunah erawh inelna chawlh rih a ṭul ta thung.

"Covid-19 vanga hun harsa kan tawh lai hian IPL-a inhnamhnawih zawng zawngte an chhungte nena him tak khawsa turin duhsakna kan hlan. BCCI chuan IPL 2021 him taka buatsaih chhunzawm a nih theih nan theihtawp a chhuah ang," tiin thuchhuah an siam a, IPL ti hlawhtlingtute chungah lawmthu an sawi bawk.

Engtin zel?
Cricket Association of Mizoram secretary Mamon Majumder chuan, "IPL khelh chhunzawm ngei kan tum a, hun awl kan dap a ṭul dawn. Amaherawhchu kuminah T20 World Cup a awm dawn avangin hun awl hmuh a harsa khawp ang," tiin IPL chu khelh chhunzawm loh theih a nih thu Vanglaini a hrilh.

IPL him taka kalpui a nih theih nan hian BCCI pawhin sum an seng nasa a, IPL inelnaa telte Covid-19 test nana season khata an sum dah ringawt hi cheng nuai 1,200 bawr vel a ni daih. Amaherawhchu India rama Covid-19 a pun zel avangin 'bio bubble' pawh a him ta lo a, khawvel cricket inelnaa sum tam ber hi an chawlh rih a ṭul dawn a ni.

IPL chawlh a nih hma hian round sarih khelh zawh a ni hman a, round riatna an khel ṭan tihin tihtawp a ṭul. Tunah hian match khelh tawh zawng zawng hi 29 a ni a, match riat khel tawh Delhi Capitals chuan point 12-in hmahruaitu an ni mek. Chennai Super Kings leh Royal Challengers Bangalore ten match khata khel tlemin point 10 an hmu ve tawh bawk.