Curry hoin GSW an chak

NBA playoff khelh loh hlauhthawnawma ding mek Golden State Warriors chuan an beiseina an la chhawm nung ve zel. Nimin zing khan Stephen Curry a point 41 hmangin New Orleans Pelicans lakah 123-108 in hnehna an chang.

Smoothie King Center-a inkhelah GSW tan Curry-a'n bul a ṭan fuh a, quarter hmasa ber aṭangin a team chu dinhmun ṭha zawkah a dah. Curry bakah hian Draymond Green (10 point, 15 assist leh 13 rebound) a thawh hlawk hle, player ṭha pahnih hian playoff thlen ngei an tum.

Golden State hian regular season kal laiah vawi 33 chak ni hmel an hmu ta chiah, Western Conference table-ah pariatna an ni - playoff khel phak chinah an awm. Mahse, an hnuaia mi Memphis Grizzlies aiin match khatin an khel hnem zawk.

Warriors hian khelh hmabak match sarih an la nei, an chak vek a nih chuan playoff an khelh ngei pawh a rinawm. Mahse, a zawna hnehna chan pawh thil harsa a ni dawn, regular season tawp lamah playoff inchuh boruak a sang chho dawn.

American guard Curry chuan, "Inrintawkna nen nuamti taka kan inkhel a nih chuan result ṭha kan hlawh chhuak mai ṭhin. Kei pawhin nuamti taka khelh hi ka duh dan ber a ni, pawn lam boruakin min ti buai lo se, kan hmabak hlen chhuah ngei kan tum ang," a ti.

Season hmasa khan Curry hian hliam vangin match a khel muamal lo, a awm loh hlanin GSW an che hleithei lo. Playoff chu an tan beisei ngam a ni lo a, conference team 15 zinga a hnuaihnung an ni, kuminah erawh an thiampuipa hoin hma an sawn leh ta deuh.

Nimin zing inkhel dangah Los Angeles Lakers chuan Denver Nuggets lakah 93-89 in hnehna an chang a, a zawna match thum an chak loh kaltluang lai chu an titawp. Lakers tan point 25 neitu Anthony Davis a langsar a, ani bakah hian player pathum dangin point 10 an nei.

NBA champion hian an thiampuipa LeBron James chu hliam tenau vangin an chhawr thei lo. James hi hun rei tak a chawlh hnuah tun hnaiah a lo kir a, beisei erawh a la phak thei lo - tuna hliam a nei leh ta hi team tan a pawi thei tawh ang.

Western Conference hma-hruaitu Utah Jazz erawh a vawi 47 nan an chak. Jazz hian San Antonio Spurs chu 110-99 in an hneh a, regular season kal laia team 30 zinga chak hnem ber dinhmun an luah.