Serie A aṭangin Parma an tla

A zawna season thum Serie A an khelh hnuah Parma an tla leh ta. Thawhṭanni zan inkhelah Parma hi Torino lakah 1-0 in an tlawm a, Italian football inelna sang bera beisei an neih chu a mit chhunzawm nghal bawk.

Torino tan Mergim Vojvoda chuan minute 63-naah goal awmchhun hi a khung a, hnehna an chan avangin Torino hi relegation zone aṭangin point thumin an him chiah thung a, khelh hmabak pali an la nei.

Parma manager Roberto D'Aversa chuan, "Mi puitling awmkhawm vek kan ni a, theihtawp kan chhuah hnua hetiang kan tawng hi chu kan hrethiam. Amaherawhchhu, player ṭha leh theihna sang tak tak nei kawl chunga kan tla hi chu a mak zawk hle.

"Tun ṭuma Torino nen kan inkhel pawh kha thlir kir ila, goal khung theihna remchang insiam hnem leh khel ṭha zawk kan ni tih chu inhmu ngei ang. Mahse a hmawr kan bawk thei lo a, a tawpah chuan a vanduai zawkah kan ṭang a ni," a ti.

Serie A-ah hian Inter Milan an champion chiang tawh, table mawngphah luahtu Crotone leh an chunga awm Parma an tla chiang tawh bawk. Benevento, Cagliari, Spezia leh Torino-te chu tlak hlauhawm zinga mi an ni bawk.