Swiatek ngamtu Ashleigh Barty

Clay court chunga inkhel thiam pahnih Ashleigh Barty leh Iga Swiatek te chu Thawhṭan zan khan Madrid Open-ah an inkhel, world number 1 Barty zawkin 7-5, 6-4 a hnehna changin quarterfinal a in vaw kai.

Australian nula Barty hian 2019 khan French Open title a la a, nikhum khan hri leng vangin a inlan lo - clay court bikah a zawna match 19 chak zawn lai a ni. Swiatek pawh a nep lo, season hmasa khan Roland Garros champion niin clay-ah match 18 chak zawn thei ve tho a ni bawk.

Player pahnih hi clay-a inkhel thiam an ni a, kumin French Open-ah pawh champion tura rinkai an ni. Madrid Open hi French Open inbuatsaihna a ni nghal a, hnehna changtu Barty hian inrintawkna a neih belh ngei ang.

Kum 25 mi Barty chuan, "Ka khelh danah ka lungawi hle, ka khingpui Iga pawh khan a khel ṭha hle. Na takin min nawr a, a ball vuak a dikin service a nei ṭha bawk, hetiang match hautak bikah hi chuan chak turin vanneih tel a ngai ṭhin," a ti.

Barty hian a match lehpekah chuan Petra Kvitova a hmachhawn dawn. Madrid Open vawi thum champion tawh Kvitova hian Russian nula Veronika Kudermetova chu 6-3, 4-6, 6-4 in a lo hneh ve thung.

Inkhel dangah seeded pariatna Belinda Bencic pawhin Ons Jabeur lakah 7-6 (7/2), 4-3 in hnehna a chang, set hnihna an khelh laiin Jabeur hian hliam a tuar a, a inkhel chhunzawm thei tawh lo.