Sevilla an champion dawn lo?
Thawhṭanni zan, zanlai thlen hma thleng kha chuan La Liga-ah champion thei team pali an awm a, Sevilla leh Athletic Bilbao intawn hnuah erawh thawnthu a danglam ta.
La Liga nomawi beisei zinga mi Sevilla hi Athletic Bilbao lakah 1-0 in an tlawm a, an elpuite hi Atletico Madrid, Real Madrid leh Barcelona an nih avangin champion beiseina a tlem ta hle. Seville khawpuia inkhelah Bilbao tan Inaki Williams chuan minute 90-naah inkhela goal awmchhun hi a khung a, Sevilla tan chhanletna hun a awm tawh lo.
Julen Lopetegui-a naute hian hnehna chang zo lo mah se table-ah palina dinhmun an la luah chhunzawm zel a, hmahruaitu Atletico Madrid chu point ruk ngawtin an thlau ta thung.
Beisei loh result
Athletic Bilbao-in an league match hnuhnung pariat aṭangin vawi khat chiah chak an nei a, vawi khat tlawmin vawi ruk an khingpui an inhnehtawkpui - chhuan tur an nei lo hle.
Hei mai hi a ni lo. April-ah khan Copa del Rey final vawi hnih an khel a, Covid-19 vanga tih khawtlai 2019-20 season final-ah April 3 khan Real Sociedad an ngam lo a, tun season final-ah April 17 khan Barcelona an ngam lo zui.
Sevilla erawh March 6 hnua La Liga-a la tlawm leh lo an ni a, an league match hnuhnung pariatah vawi khat draw result an nei tih loh chu an chak vek - Bilbao lakah pawh an tlangnel a, chak ngei tura ngaih an ni.
Mahse, 74% ball chang a, vawi 18 zet shot an nei chungin Sevilla-in goal net an zawng hmu zo lo a, Bilbao lamin minute 90-naah Inaki Williams hmangin an khung - sutna hun a awm tawh lo a, chak phu zawk Sevilla an tlawm.
Lawm lohna
Sevilla-in an beisei ang result an hmu lo a, coach Lopetegui a lawm lo lehzual. Season thara Champions League khel tura tling chiang tawh team hian an beisei angin second half-ah penalty an hmu lo.
Athletic defender Mikel Balenziaga chuan Jesus Navas cross aṭanga ball kal chu a kutin a tawk fuh a, penalty ni ngei turin lang mah se referee-in ngaihdan dang a neih avangin pek an ni lo a, Sevilla an vanduai.
Real Madrid boss hlui chuan, "Awlsam taka penalty hmu mai tur kan ni a, mahse, zanin zet zawng kan vanneih zan a ni lo a ni," a ti a, vanduai vanga chak lo an nih thu a sawi. Sevilla hi an beisei penalty pek an nih loh bakah an forward chhuanvawr Lucas Ocampos leh Youssef En-Nesyri-ten an hun ṭha neih an chhawr lo bawk a, inkhel an thlir let chuan an hun khawhral hi an ui vawng vawng ang.
Unaua footballer
Bilbao hi goal an khung hma hian chance nei lo tawp an ni bik lo tih hriat tel a ṭha a, striker Asier Villalibre-a hun ṭha khawhralte kha uiawm tak a ni ve tho.
Hetihrual hian Nico Williams chuan goal hmahruai a khungah inngai mah se offside vangin pawmsak a ni lo bawk a, kum 18 mi Nico hi hun tawp dawna goal khungtu Inaki unaupa a ni. Nico hian hriat la hlawh tawk lo mah se Inaki erawh kum 26 lek ni chungin Bilbao legend ang hiala chhal ngam a ni tawh a, European football-ah a mikhual lo hle.
European club lian tam tak chil tiputtu hian tun season inelna hrang hrangah match 42 khelin goal riat a khung tawh a, assist vawi riat a nei tawh bawk.
A tawp thlengin
Sevilla hian May 9 zanah league match an khel zui leh dawn a, Real Madrid an lenchilh ang - Real hi an hneh a nih chuan champion beiseina an la nei thei ang.
May 9 zana Real leh Sevilla inkhelh hma hian May 8 zanah Barcelona leh Atletico Madrid an inkhel dawn bawk a, he inkhelah hian Barca an chak chuan Sevilla tan pawh kawng a inhawng zau leh zual sawt dawn tihna a ni nghal.
La Liga-ah club 20-ten match li chauh khelh tur an nei tawh a, an player neih dan nena en kawp chuan Bilbaoa laka an tlawm bawk avangin champion thei zingah Sevilla dinhmun a duhawm lo ber - beiseina erawh a la mit lo.
Sevilla boss Lopetegui chuan, "Nomawi beisei ngam tur khawpin season kan hmang a, hetah hian kan tawp mai lo ang," a ti a, La Liga nomawi a la beisei.
