Inter Milan champion puitu Romelu Lukaku

Romelu Lukaku-a'n 2019 nipui bazar lai khan Inter Milan a pan a, a man zat chu pound maktaduai 74 zet a ni! Belgium international striker chungah hian mawhphurhna tam tak a tla nghal a, a hlen chhuak thei ang em tih hre châkin an thlir ṭhup.

Italy a pan kumah hian hlawhtlinna a chang nghal mai bik lo, a kum hnihnaah erawh Juventus 'meuh' khumin Serie A nomawi an chawi ta rup mai - Scudetto an la tih a chian hnuah Lukaku chuan, "Football ka khelh china ka kum ṭha ber a ni," tiin a sawi.

An hnawl kha...
Everton tan a theihna sang tak a lantir a, club lian zawk Manchester United chil ti putin Old Trafford lama sengluh a ni. Beisei a sang a, tharum hman tamna Premier League striker ṭha leh hriam ber tura ngaih a ni hial.

Mahse, beisei ang ngawt chuan thil a kal lo. United tan hian match 96 aṭangin goal 42 a khung, a goal khung zinga 26% hi jersey sen a hak tir lam thla hnih chhunga a khung a ni - a hnu lamah chuan sawiselna leh anchhe tinreng a dawng.

Thawkrim lo, ball khawih mawi lo leh thiam tawk lo, hun ṭha bawlh pelh hnem tihte chu an sawiselna langsar a ni. Ole Gunnar Solskaer-a'n chher hriam ai chuan hralh a duh zawk, hnawl hnu ni mah se a kum leh theihna chhutin a man erawh a la tam tham hle.

Icardi thlaktu
Inter Milan hian player duh bik, thiam leh hruaitu an nei ṭhin - a hming chu Mauro Icardi a ni. Argentine striker hi Inter fans lamin an ngaina a, theihna a nei sang bawk; kum naupang tak ni chunga captain armband hreng thei a ni.

Mahse, Icardi hi a famkim bik lo, a hun hnuhnung lamah 'neuh neuh' a nei a, lal ang maia a awmna San Siro aṭanga a chhuah a ngai hial; a hmun ruakah Lukaku a rawn awm thung - a thlak tak hi Serie A match 169 bul a ṭan aṭanga goal 111 khung thei a ni tih hriat a ṭha.

Mahse maw, Icardi-a'n zuankahlen tur a dah hi sang viau mah se Lukaku hian a khum thei! League match 63 bul a ṭan aṭangin goal 44 a khung thei a, striker hmasa Icardi khan goal khat khung tura minute 136 a mamawh laiin Lukaku chuan minute 129 chauh a mamawh.

Martinez nen
Everton leh Manchester United tana a khelh laiin Lukaku hi 'striker mal tlat' a ni ṭhin. Antonio Conte enkawl Inter Milan erawh 3-5-2 formation hmanga khel ṭhin an ni a, tlarhmaah Lukaku leh Lautaro Martinez te an inkawp ṭhin.

Inter striker pahnih hi an in man hle, goal khung tura Martinez a awm hmain Lukaku a tawlh hnung hret a, Belgium international hi box chhunga a awm theih nan Argentina international zawk hi a siamsak tu zawkah a lo awm ve leh thung ṭhin a ni.

Goal khung leh a siamsak kawngah an thawh hlawk dun hle. Player pahnih hian vawi 64 bul an ṭan dun tawh a, ṭhiante khung tur vawi 18 insiamsak tawhin, an pahniha goal khung belhkhawm pawh goal 87 zet a ni.

Conte puihna
Lukaku hian khelmual chhunga a chet ṭhat theih nan Conte-a a mamawh, Italian manager hian atana khelh dan phung ṭha zawk a chhawp chhuahsak bakah a ei leh in (diet) thlengin a tih danglamsak hial.

6 ft 3 in zeta sang striker hi a taksa pawh a rit tham a, intih zan a mamawh. Sa pawh a duh zawng zawng a ei ngawt thei tawh lo, arsa, sangha leh tlai thar lam an ei nasattir a, hei hian a rihna a tih hniam - tun hma aiin a chet ran bakah a tlan chak zawk niin sawi a ni.

A khelh dan phung, ei leh in thlenga thlak a nih avangin khelmual chhungah pawh a danglam. Tlarhnung venhim lamah pawh a ṭangkai a, February thlaa Lazio an hneh ṭum khan, center piah lama a ball chan chu an khingpui goal bul thlengin a tlanpui a, chumi hnuah Martinez tan a siamsak.

Thui tak tak ball tlanpui hi tun hma lama a la tih tam loh, manager thar Conte hnuaiah a hmasawnna langsar tak nia sawi a ni. Counter attack aṭanga ball kengtu pawimawh a ni a, goal zawna a pet nghal loh pawhin a ṭhiante tan a siamsak ṭhin.

Big Game a ngam ta
Tun hma lam chanchin sawi hmasak a ngai leh ṭhin. Manchester United tana a khelh laia an sawiselna pakhat chu, club lian a ngam lo, tih a ni. EPL club lian paruk 'Big Six' laka match 16 bul aṭan aṭangin goal khat a khung a, assist vawi li a nei.

Club lian a ngam lo tia sawiselna hi Inter Milan a zawm tih season-ah pawh a la chhawm zel! Champions League group stage an paltlang theih ngeina turah, Barcelona an hmachhawn ṭumin hun ṭha a hlah, Europe League final-a Sevilla nen an inkhelh ṭumin chance ṭha bik a hlah bawk.

Tun season-ah erawh thawnthu a danglam ta. Inter elpui club lian paruk - Milan, Atalanta, Juventus, Napoli, Lazio leh Roma lakah inkhel bul vawi 10 a ṭan a, goal riat a khung a, a goal khung zat hi assist a nei bawk - thawnthu hlui chu a tharin a thlak ta.

Lukaku chuan, "Slavia Prague nen UCL kan khelh hmasak ber kha ka la hre reng, ka khel chhe hle. Player dangte hmaah coach-in min hau a, ka khel chhe chhunzawm a nih chuan minute nga hnuah thlak nghal ka nih tur thu min hrilh hial.

"Thlak ngaiin ka awm ta lo, a hnu lawkah Milan Derby kan khel a, season kal laia ka match ṭha bera chhal ngam ka khel chhuak zui nghal. Inrintawkna min siamsak a ni satliah lo a, rilru muhil chu a kaitho bawk a ni," tiin Conte a dah sang hle.

Season ṭha ber a ni - Lukaku
Italian football roreltu chu Juventus an ni, tih a ni ṭhin. Old Lady hian season kua ngawt a zawna Serie A title an lak theih avangin midang chunga leng an ni - mahse Turin club rorelna hi Antonio Conte leh Romelu Lukaku ten an titawp.

Conte leh Lukaku awmna Inter hi season hmasa khan Serie A-ah pahnihna an ni, an chunga awm Juventus chu point khatin an phak lo. An inthlauhna hi tlem viau mah se Juve hi an champion chian hnua point hloh tam an nih avangin Inter nen an inkar hi a zau viau tho.

Kuminah erawh Cristiano Ronaldo awmna Old Lady aiin Nerazzurri an chungnung chiang hle, league match khelh hmabak pali ngawt nei chungin Inter an champion fel der tawh - club dang chungah an leng. Kum 27 mi Lukaku chuan, "Football ka khelh tawh china season ka hman ṭhat ber ṭum a ni. Inter tana ka inkhel thei hi ka inchhuang a, tawpchin awm loa min thlawptu fans chungah ka lawm takzet.

"Champion kan ni tih ka hriat chian hnu khan kawrthlerah ka kal chhuak, a chhan chu fan-te nena champion lawm kha ka chak a ni. Season hmasa pawh khan ṭha takin kan khel tawh, kuminah nasa zawka hmasawn lehin hetiang dinhmun hi kan thleng," a ti.

Inter hian tun hmain league title chu a lo chawi fo tawh, amaherawhchu tun ṭuma mi hi season 11 hnua an champion lehna hmasa ber a ni a, an nghah rei em avangin nomawi dangte aiin a hlu zawk ngei ang.