West Brom tan thilmak a thlen a ngai tawh - Big Sam

Thawhṭanni zan Premier League inkhelah West Brom leh Wolverhampton Wanderers 1-1 in an inhnehtawk. Baggies hian match 34 aṭangin point 26 an hmu a, match li khelh tur la awmah a him chin chiaha awm Newcastle United chu point 10-in an pha lo.

Inkhelh banah West Brom manager Sam Allardyce chuan, "Premier League kan khel zel dawn a nih chuan thilmak a thlen a ngai tawh," tiin team enkawltu berin a sawi.

Point khat chauh
West Brom-in Premier League-a inhamtang turin point thum an mamawh a, match hnuhnung pahniha Leicester City 3-0 a an hneh loh bakah Aston Villa nen 2-2 a an inhnehtawk avangin chak an mamawh lehzual.

Amaherawhchu Hawthorns-ah mualneitu Baggies-in chak mamawh miau mah se Wolves an khel ṭha zawk. West Brom keeper Sam Johnstone-a'n ṭha zetin Nelson Semedo goal khung tur a dansak a, first half tawp hma hretin Wolves forward Fabio Silva-a'n vannei takin a khung.

Silva hian mawi takin a khungah a ngaih theih a, replay aṭanga en hnuah erawh Baggies defender Kyle Bartley-a'n a pet per vanga lut a ni tih a hmuh theih thung.

Second half-ah West Brom an insiamṭha a, Conor Gallagher-a'n hnai tak aṭangin a pet goal. Minute 62-naah Mbaye Diagne-a'n chiang zetin Conor Townsend cross a tauh lut a, 1-1 a ni. Inkhel a hmuhnawm chhunzawm a, goal hmuh tur erawh a awm tawh lo.

Beisei a chau
Baggies manager Sam Allardyce chuan, "Kan khelh dan thlirin point thum kan hmu lo kha kan vanduai a ni. Wolves goal khung kha en nawn leh ula, an vannei takzet. Premier League kan khel zel dawn a nih chuan thilmak a thlen a ngai tawh," tiin a sawi.

West Brom hian match li khelh hmabakah Arsenal, Liverpool, West Ham leh Leeds United te an la hmachhawn dawn a, chak vek pawh ni se point 38 an hmu pha dawn chauh tihna a ni.

A him china awm Newcastle leh an chung chiaha awm Burnley ten point 36 ve ve an hmu a, match li khelh tur an la neih ve tho avangin Baggies tan beisei tur a awm tawh loah a ngaih theih.