City-in Belgrade winger Stevanovic lalut dawn

Manchester City-in transfer bazar lamah an mit an len chhunzawm reng a, thlasik transfer inhawn ruala lakluh turin Partizan Belgrade winger Filip Stevanovic chu inremna an neihpui. 

Kum 18 mi rawlthar duhawm hi Manchester United, Real Madrid, Liverpool, Bayern Munich, Chelsea, Juventus, AC Milan, Borussia Dortmund leh Inter Milan nen sawizawm a ni a, a tawpah City-in an chang. 

Khawthlang media-ten an tarlan dan chuan Stevanovic hi City hian pound maktaduai rukin an lalut dawn a, hetihrual hian January-ah City squad-a zawm nghal ang nge, loan-in a chhuak lehnghal ang, tihah chuan thuchiang a la awm lo thung. 

Stevanovic hian season hmasa khan Partizan tan inelna hrang hrangah match 35 khelin goal kua a khung a, assist vawi thum a nei bawk - tun season-ah match 11 khelin goal thum a khung bakah assist vawi hnih a nei. 

Serbian media lamin Ronaldo nena an khaikhin forward chuan, "Ronaldo hi ka player duh zingah a tel lo - goal khung leh thawhrimna lam kan en erawh chuan entawn tlak tak a ni. 

"Mahni infak ka duh lo a, mi tih tura dah ka duh. Mahse, kei chuan ball chawh kual vel hi nuam ka ti a, Ronaldo erawh a ni ve lo. Ronaldinho kha a thiam chungchuang a, Lionel Messi emaw Neymar ang nih pawh ka châk a, mahse Ronaldinho erawh a danglam bik a ni," a ti. 

City lamin player thar lakluh chungchangah hian official taka puanzarna la nei lo mah se Stevanovic khelhna Partizan Belgrade chuan Premier League club nen hian inremna an neih tawh thu an ziak a ni. 

Premier League-a beisei phak lo City hian zanin dar 1:30-ah Champions League group stage match an khel dawn a, Greece club ṭha Olympiakos an mikhual dawn - City hian match hnih an khelhah vawi hnih hnehna an chang tawh.