Hammers-in Champions League la beisei

West Ham-in Champions League beiseina chhi nung turin Thawhṭanni zan khan Burnley 2-1 in an hneh. Burnley hian Chris Wood hmangin hma hruai hmasa mah se Hammers hian Antonio goal hnih hmangin an lehthal.

David Moyes-a hote hian point 58 an hmu a, panganaah awmin match 34 khelh zawhah palina Chelsea an phak lohna chu point thum chauh a a ni.

Beiseina siamtu Antonio
Turf Moor-ah Burnley forward Chris Wood-a'n box chhunga ball a sep kual a, Tomas Soucek lakah penalty a hlawh chhuak. Wood hian penalty hi pet nghalin minute 19-naah a khung.

Minute 21-naah Hammers-in siphurh an sut nghal a, Vladimir Coufal-a cross chu Antonio-a'n mawi zetin a tauh lut. Minute riat hnuah Said Benrahma cross chu Antonio bawkin mawi zetin a tlawh luh leh bawk.

Burnley forward Matej Vydra pawhin keeper Lukasz Fabianski pet khum vek tawh mah se Hammers defender Craig Dawson-a'n goal line aṭangin a tauh chhuak. Second half-ah Burnley subsitute Jay Rodriguez pawhin hnai tak aṭangin a pet out a, Hammers midfielder Jesse Lingard pawhin goal khungna hun ṭha a bawhpelh bawk.

UCL khelh inchuh
West Ham boss David Moyes chuan, "Kan khel ṭha a, kan vannei tel bawk. Season thara Champions League khelh chu a châkawm khawp mai. Beiseina kan neih chhunzawm zel hi a ṭul a ni. Chutihrualin Europe inelna tel tur chuan chak vek a ṭul a rinawm a, kan dinhmun thlir hian kan thleng ta lo a nih chuan kan rilru a na khawp ang," tiin a sawi.

Goal hnih khungtu Antonio hi malpui hliam vanga kar li a chawlh hnuah a rawn kir a, hmun pawimawh a chang nghal. Antonio chuan, "Tute pawhin Champions League khelh chu an duh alawm. Season tam tak Premier League khelh chhunzawm turin ka lo bei tawh ṭhin a, tunah chuan Champions League khelhna kawng a inhawng. Kan tlawm mai dawn lo a, a tawp thlengin kan bei ang," tiin a sawi

Hammers hian Everton, Brighton, West Brom leh Southampton te an la hmachhawn dawn a, chak vek thei dinhmunah an din avangin an chunga awm Blues hi la lehthal thei an ni.