Alaba-a'n Bayern a chhuahsan dawn?

Bayern Munich-in Champions League group stage paltlang turin harsatna an tawh a rinawm loh. Bavarians hian zanin dar 1:30 hian RB Salzburg an tlawh dawn. European champion buaina hi an inkhel turah ni loin an player David Alaba chungchangah a ni.

Treble champion theihna tura defender pawimawh David Alaba hi tun season tawp rualin contract a zo dawn a, German champion hian contract thar zawrh mah se inremna an nei thei lo.

Bayern president Herbert Hainer chuan Alaba chungchang buaina inremna hun atan hian October 31 a ruat a, November kan chuang kai tawh chungin inremna a awm thei ta lo. 

Hainer chuan, "Contract ṭha tak kan zawrh a, David-a agent Pini Zahavi bulah pawh October thla tawp hmaa an thutlukna hriat kan duh. Chanchin engmah kan hriat tak loh avangin sporting director Hasan Salihamidzic chuan agent a be ta a, kan contract zawrhin an beisei a la phak loh thu a lo hrilh. Thutlukna kan siam ta a, contract kan zawrh tawh lo," tiin Alaba an dawr chhunzawm loh tur thu a sawi.

Kum 28 mi Alaba hian Austria Wien aṭangin kum 2008 khan Bayern youth academy a zawm a, kum 2009 aṭangin senior team tan a khel ṭan. Austria international hi Champions League-ah vawi hnih, Bundesliga-ah vawi kua, DFB-Pokal-ah vawi ruk leh FIFA Club World Cup-ah vawi khat a champion pui a, sulhnu a nei 

ṭha hle.

Tunah erawh inremna an neih theih tak loh avangin Alaba hian January thla aṭangin dan ang thlapin club dang a dawr theih tawh dawn a, Europe club lianin Austria defender hi an inchuh ang.

Bayern manager Hansi Flick-a'n season liam ta khan chhawr zui tawh lo tur Thiago Alcantara, Philippe Coutinho leh Ivan Perisic te pawh hmun pawimawh a la changtir. Hemi a nih avang hian kumin chiah contract nei tawh Alaba-a'n hmun pawimawh a chan chhunzawm a rinawm.