Villa harh a tlai hret

Aston Villa-in minute 58 chhungin Southampton lakah goal li an chhuah a, an mualpho mai dawna a lan hnuah goal thum rawn khung mah se goal an chhuah hnem hman avangin 4-3 in an tlawm. 

Saints hian minute 20-na aṭangin goal an khung ṭan a, Jannik Vestergaard chuan goal hmahruai hi a khung - Danish centre back Vestergaard-a goal khung tur siamsaktu James Ward-Prowse chuan freekick hmangin goal hnih a khung ve bawk. 

English midfielder Ward-Prowse-a'n goal hnih leh assist hmangin kum 26-a tlinna piancham a lawm a, Danny Ings-a'n goal khung loh bik a duh lo - minute 58-naah mawi zetin a khung. 

Villa an mualpho dawn nia a lan hnuah Tyrone Mings chuan minute 62-naah si phurh a rawn sut ṭhen - hun pek belhah Ollie Watkins (penalty) leh Jack Grealish-ten goal khung ve leh mah se an harhchhuah a tlai a, 4-3 in an tlawm ta tho. 

Champion team Liverpool meuh 7-2 a sawp thei Villa hian league-a an match hmasa paliah hnehna an chang a, a hnuhnung pahnihah an tlawm ve ve thung - a tak ram an tawng chho mek.