Pep-a leh Man City-in final an thleng ta
Pep Guardiola kaihruainain Manchester City-in chenna ngai loh ram Champions League final an thleng a, May 29 hian Instanbul-ah nizana Real Madrid leh Chelsea inkhela chak zawk nen nomawi an inchuh ang.
Thawhlehni zan khan Man City hian Eithad Stadium-ah Riyad Mahrez-a goal hnih hmangin Paris Saint-Germain 2-0 in an hneh a, Guardiola hote hian season liam ta finalist hi aggregate-ah 4-1 in an hneh.
Piancham thilpek
Manchester City boss Pep-a'n rin lawk ang ngeiin Sergio Aguero, Gabriel Jesus leh Raheem Sterling te bench-ah a dah a, forward nei loin bul an ṭan. Goal khung lo pawha final an thlen theih vang lam ni loin an tih dan pangngai a ni.
Midfield-ah player naupang zawk Rodri aiah Fernandinho thlan a ni a, Pep-a'n Brazilian midfielder hi kum 36 pianchampha lawm nan captain armband nen bul a ṭantir a, a tawp thlengin a khel ṭha hle.
Mbappe a tel lo
Inkhelh ṭan hma thlenga ngaihven hlawh chu Kylian Mbappe a ni a, French forward hi a dam hman ta lo. Starting eleven tur an puang a, Mbappe hi bench-ah a awm.
Second half-a goal mamawh tak tak hnuah pawh Mbappe hi luhtir a ni lo a, inkhel turin a la inpeih lo tih a chiang. Mbappe ai hian Mauro Icardi a lut a, Argentine forward hian French forward hmun ruak a luah hneh lo.
Rial leh vur hnuaiah
England-ah May thla thleng te vur a tla ṭhin a, UCL semifinal khelh zan ber kherin vur leh rial nasa takin a tla. Khelmual a var vo avangin TV aṭanga inkhel thlirtu tan hmuh a nuam tawk lo a, inkhel hrim hrim erawh hmuhnawm tak a ni.
PSG-in Pep-a kaihhruai City an hmachhawn chungin ball an chang tam zawk a, hei hian thil awm dan a sawifiah. Neymar leh a hoten goal beiseiin an nawr a, keeper Ederson an ti buai pha lo. Chutihrualin referee-in Oleksandr Zinchenko kutin ball a fuhah a ngaih avangin minute sarihna lekah penalty a pe a, VAR-in Man City a chhan hlauh.
Mahrez leh Ederson
Poch-a'n a player-te a rem dik a, Man City-in tlarhnunga ball an inpe tur an veng ṭhap. Amaherawhchu City keeper Ederson hi ball pet nat vanga lar a ni a, minute 11-na lekah Brazilian keeper hian Zinchenko um turin ṭha zetin mual vei lamah a vawrh lut.
PSG left back Alessandro Florenzi dem theih a ni lo a, City game plan lawk sa tih hriat takin Zinchenko-a'n halfway line a pelh loh avangin a offside lo. City left back hian Kevin de Bruyne pein Belgian midfielder hian ṭha zetin a pet a, PSG defender dan per chu mual dinglam ṭanga rawn tlan lut Mahrez-a'n goal-ah a chantir.
City goal khat hian inkhel a ti danglam tam lo. PSG hian goal hnih khung an la mamawh tho a, inkhelh ṭantirhah erawh goal hnih an chakpui thei a, tunah erawh goal hnih hmang hian extra time an khel thei thung. PSG-in an nawr chhunzawm a, Marquinhos-a'n crossbar a tauh per bakah Angel di Maria-a'n chance ṭha neihah goal pawnah chiah a pet bawk.
First half-ah goal dang a luh belh tawh lo a, halftime laiin ground ti faitute an che ṭha a, second half-ah erawh khelmual a hring ṭha leh tawh hle. Minute 63-naah Man City-in goal hnihna an khung a, Ederson aṭanga inṭan niin mual vei lam aṭanga Phil Foden-a cross chu Mahrez-a'n a hmawr a bawk.
PSG tana harsatna belhchhah turin Angel di Maria chu hnawhchhuah a ni a, Argentine forward hian ṭul lo takin Fernandinho a tlawh luih avangin minute 69-naah hnawhchhuah a ni. Player 10-a khel French club tan goal thum khung a ngai a, thawhchhuah ngaihna a awm tawh lo. Man City-in goal hmaah a hlauhawm zawk tawh a, hun tawp lamah Jesus, Aguero leh Sterling te rawn lutin goal erawh hmuh tur a awm tawh lo.
City bang rinawm
Man City-in hnehna an chan theih nan Ruben Dias hoa inrem City tlarhnung an khel ṭha lehpek hle. Portuguese defender hi man of the match-ah thlan a ni a, a kawppui John Stones pawh a che ṭha takzet.
Pep-a'n ball chan tam leh goal khung ringawt a tum tawh lo a, PSG nen pawh ball chang tlem zawk an ni. Amaherawhchu Man City tlarhnung a phui miau a, Dias leh Stones ten Neymar-a'n chance ṭha a neih loh nan an inthlawp ṭha em em a, Mbappe aia lut Mauro Icardi phei chu an dah bo hneh hle.
English club hian tun season UCL-ah match riat ngawt clean sheet an nei tawh a, match 12 aṭangin goal li chauh an la chhuah bawk. Pep-a hote hi tlarhma vangin vak an hlawh ṭhin a, tun season-ah erawh an tlarhnung hnathawh hi a langsar hle.
A hming chu Pep Guardiola
Pep Guardiola hian Manchester City hi Champions League-ah champion pui lo mah se football ngainatu tam tak mitah chuan khawvel manager ṭha ber zingah a tel pha dawn tho tho.
Spanish manager Guardiola hian Manchester United manager Sir Alex Ferguson-a'n ṭhenawm bengchheng ti leka a sawi ṭhin Manchester City chu Europe club ṭha zingah a hlangkai a, Champions League-ah pawh final an luh tak avangin an ban phakah nomawi a awm ta.
PSG an hneh zawhah Pep-a chuan, "Kan hnehna chan hi kan vai tan a ni. Ka rilrua awm hmasa ber chu vawiina khel ve lo player-te an ni a, tun season-a an khelh dan thlirin khelh vek an phu a, mahse an vaiin an tel thei si lo. Hnehna kan chan nan hian an ṭangkai vek. Premier League-ah kan champion phawt ang a, chumi zawhah chuan final atan kan inpuahchah ang," tiin team boruak ṭhat nan a player thlan loh te a fak hmasa.
Man City bench-ah hian club legend Sergio Aguero bakah player ṭha dang Gabriel Jesus, Raheem Sterling, Aymeric Laporte, Rodri, Joao Cancelo te an ṭhut miau avangin Pep-a'n ṭawngkam a chhep fuh hleah a ngaih theih.
Pep Guardiola hian Barcelona a enkawl laiin Champions League final hi vawi hnih a thleng tawh a, nomawi a chawi ve ve. Amaherawhchu Bayern Munich a enkawl ṭumin vawi thum ngawt semifinal thleng mah se final a lut lo a, kum 2016 aṭangin Man City hi enkawl ṭanin tun hi kum 2011-a Barca a champion hnua final a luh lehna hmasa ber a ni.
Guardiola chuan, "Final kan lut hian kum li nga liam taa kan hnathawh khan awmzia a nei tih a lang. Ka naute an rintlak a, an hnathawh hi a ropui. Chutihrualin zanin pawh khan Marquinhos khan crossbar a tauh per. Champions League meuh chawi tur chuan vanneih a ngai. Man United champion chhan kha John Terry tawlhthluk vang leh Bayern Munich laka hun tawp dawna an goal khung a ni. Real Madrid pawhin Ateltico Madrid hneh turin minute 93-naah goal an khung chauh. UCL hi inelna harsa tak a ni a, champion tur chuan player ṭha an tel a ṭul ṭhin," tiin champion tura vanneih a ṭul thu a sawi.
Man City-in sum tam tak seng chunga nomawi an chawi loh avangin Pep Guardiola-a'n sawisel a hlawh a, amaherawhchu Spanish manager hnuaiah hian English club hian hma an sawn tih chu an nomawi lak aṭangin engkim a chiang. Pep hian Man City hi Premier League-ah vawi hnih a champion pui tawh a, vawi thumna tur an nghak mek. League Cup phei chu an ta neihah a ngaih theih a, vawi li ngawt an champion a, FA Cup-ah vawi khat an champion bawk.
Hriat tel tura ṭha chu Man City hian final lut turin anmahni ang bawka sum hmang tam PSG chu 4-1 in an hneh a, Pep-a hote hian khelmualah team ṭha zawk an ni tih an pholang. Europe-a team ṭha ber ang hiala chhal theih Man City dintu chu Pep Guardiola hi a ni a, football tana a hnathawh hi a ropui a ni.
Poch-a'n chhuanlam a siam lo
Paris St-Germain boss Mauricio Pochettino-a'n inkhel pawimawh hrem vangin Idrissa Gueye a chhawr thei lo a, World Cup nomawi hial chawi tawh Kylian Mbappe a chawr thei lo bawk.
Poch-a chuan, "An ṭha zawk a ni. Manchester City ka lawmpui a, season ṭha tak an hmang. Mbappe awm lo hi chhuanlam a tling lo. A awm lo hi kan vanduai chu ka ti a, mahse a awm loh vang kan tih erawh a thiang lo. Team angin kan khel ṭha a, Manchester City anga team ṭha lakah inkhel kan thunun thei a ni," tiin a sawi.
Tottenham manager hlui Poch-a chuan sawi chhunzawmin, "A chang hi chuan football-ah hi chuan vanneih a ngai ṭhin a, an goal khungna pawh kha kan nawr nat avanga min vuak let vang a ni. Kan khelh danah sawisel tur a awm lo a, kan khel ṭha. Kan vannei lo a, hun tawp thlenga theihtawp chhuahtu ka player-te ka chhuang hle," tiin a player a fak.
Player Inlante
Man. City: Ederson; Walker, Stones, Rúben Dias, Zinchenko; Fernandinho, Gündoğan; Mahrez, Bernardo Silva (Sterling 82'), Foden (Agüero 85'); De Bruyne (Jesus 82')
Paris: Navas; Florenzi (Dagba 75'), Marquinhos, Kimpembe, Diallo (Bakker 83'); Paredes (Danilo 75'), Herrera (Draxler 62'); Di María, Verratti, Neymar; Icardi (Kean 62')
Thlirna Tawi
• Man City-in PSG 4-1 in an hneh a, a vawi khat nan UCL final an lut.
• Pep Guardiola-a'n Barcelona a chhuahsan hnua UCL final a luhna hmasa ber a ni.
• Man City hi UCL-ah a zawnin vawi sarih an chak zawn tawh a, English club zinga chak zawn rei ber record an siam. Club pathum Manchester United (1965-66), Leeds United (1969-70) leh Arsenal (2005) te a zawnin vawi ruk an chak zawn tawh.
• Man City-in tun season UCL match 11-ah hnehna an chang a, season khata English club zinga European Cup/Champions League-a chak hnem ber an ni.
