Arsenal tan goal khung ngei ngei a ngai
Mikel Arteta enkawl Arsenal tan Villarreal lakah goal khung ngei ngei a ngai a, goal an khung thei lo a nih chuan tun season chhunga an beiseina neih awmchhun chu a thamral dawn - a hun pangngai hmain an season a zo dawn tihna a ni.
Gunners hi Spanish club nen an intawn hmasakin 2-1 in an chak lo, zanin dar 12:30 hian Emirates Stadium-ah Europa League semifinal second leg an khel ang, English club hi dinhmun chhe zawk ni rih mah se tlang turin goal khat khung a tawk.
Auba a dam
Team pahnih intawn hmasak khan Arsenal hian tlarhma lamah player chhawr tur an nei mumal lo. Malaria dam hlim Pierre-Emerick Aubameyang chu bench-ah dah a la ni a, hun tawp dawnah a inlan zeuh chauh.
Gabon international hi tunah chuan a dam chiang tawh, kartawpa Newcastle United an hneh ṭumin goal a khung bakah assist a nei bawk, zaninah a chungah mawhphurhna a tla dawn - Alexandre Lacazette pawhin training a zawm pangngai thei tawh bawk.
Arsenal tana thu lawmawm dang chu Kieran Tierney dam tawh hi a ni. Defender pawimawh Tierney awm loh laiin midfielder Granit Xhaka chu tlarhnung sirah pawh hnun a ni ṭhin a, zaninah erawh Tierney-a'n a hmun a rawn luah leh theih tawh a rinawm.
Tierney a awm chuan midfield-ah Xhaka a awm chho leh ang a, beiseina sang tak nena an lakluh Thomas Partey pawhin rilru thlamuang tak chungin tlarhma lam a pui thei tawh ang - Martin Odegaard leh Bukayo Saka te nen goal chu an sual chhuak thei tura ngaih a ni.
Emery a inringtawk
Unai Emery-a'n tun hmain Arsenal hi thla 18 chhung a lo enkawl tawh a, zaninah an inkhelhna tur Emirates Stadium hi a hrechiang. Gunners player pawimawh tam zawk pawh a enkawl tawh an ni a, a hunlaia bul ṭan ve chauhte an nih hlawh avangin beih let dan tur a ruahman thiam ang.
Europa League vawi thum champion tawh Emery chuan, "Goal khatin kan chungnung zawk mek, hei erawh inchhuanna tham tling lo. Match thar hlak khel tur angin kan inbuatsaih, tun hma lama ka sawi fo tawh angin kei chuan attacking game ka ngaina.
"Ka naute hian inrintawkna an nei ṭha, match hnuhnunga Getafe kan hneh ṭum pawh khan engthawl leh nuam ti takin an khel thei, khatiang bawk kha kan chhawm nun ka beisei. Khualmuala inkhel tur ni mah ila hlauh tur a awm lo," tiin a sawi.
Villarreal hian La Liga lamah beisei an nei tawh a, season thara Champions League khelh an beisei theihna kawng awmchhun chu Europa League champion hi a ni - an manager Emery hi European football inelna sang pahnihnaah chuan a ngaihna hria a ni a, an hlauthawng lo ang.
Arsenal ve thung
Arsenal hi chak lo ta se nghawng a nei hnem dawn. Season tharah European football an khel phak dawn lo tihna a ni a, player ṭha hip a harsa dawn a, an neih ṭhatsa ṭhenkhat pawh chelh a harsa hial ang tih a rin theih.
Arteta naute an chak a nih a, final-ah an hlawhtling zui a nih erawh chuan boruak a danglam daih dawn - Spanish manager hi season khat leh a chanve chhung leka FA Cup leh Europa League chawi thei, tia fak a ni thung ang.
Tun season Arsenal leh Arteta dinhmun hi tun hnai an match khelh hmabak tlemte hian nasa takin a ti danglam thei tihna a ni. Beisei phak lo North London club tan Europa League chauh lo hi chu tun season inchhanhimna tur kawng dang a awm lo.
First leg an khelh zawh khan Areta chuan, "Minute 90 dang kan la khel leh dawn," tiin a sawi a, anmahni mualah ngei hnehna chan a inbeisei. London khawpuia inkhel tur ni mah se a hmuna entu an awm dawn lo a, mipui fuih phurtu nei loin thochhuah an tum ang.