Theihtawp chu kan chhuah - Verstappen

Portuguese Grand Prix tlan zawh takah chak tura ngaih Max Verstappen chu pahnihnaah a thleng a, Red Bull driver hian hnehna chan tumin theihtawp an chhuah thu leh, pahnihna dinhmun chu an phak tawk a nih thu a sawi.

Qualifying lama a tlan ṭhat avangin Max hian a hmasa ber (pole) aṭangin intlansiak bul a ṭan. Mahse, kawng kawiah a kual zau hret a, a hnuah tihsual nei zui lehin a elpui Lewis Hamilton-a'n a tlan pel, a tawp thlengin Merceds driver hi a phak lo a ni.

Kum 23 mi Verstappen chuan, "Inelna kan neih zawh tak kha ka thlir kir a, mimal leh team khan theihtawp kan chhuah vek. Hnehna chan tum mah ila kan theihtawk aia sanga chet theih a ni lo, pahnihna kha kan tlin tawk chu a ni rih.

"Tun season hi kum dang zawng aiin a ngaihnawm zawk dawn niin ka hria, kei chuan theihtawp ka chhuah chhunzawm dawn. Lewis hi driver ṭha bik a ni a, amaherawhchu ani el tur hian kan team pawh kan ṭha ve tawk," a ti.

Season kal laiah F1 intlanisak vawi thum a awm tawh, champion lai Hamilton-a'n vawi hnih hnehna a chang a, a chak loh ṭumin Verstappen hi pakhatna a ni thung - anni pahnih hian pakhatna leh pahnihna dinhmun an inluah chhawk zel.

Red Bull team boss Christian Horner chuan, "Boruak sang leh lum karah pawh Max hian ṭha takin inelna a hmachhawn ṭhin, tun ṭumah pawh khan a vanduai vang chauha hnehna chang lo mai a ni. Mercedes hi hneh theih an nih zia chu a takin kan lantir ang," a ti.