Nets an che fuh hleithei lo

Kevin Durant leh Kyrie Irving te awm mah se James Harden a awm lo a, team ṭha Brooklyn Nets pawh tun hnaiah an che hlei thei lo. Nimin zing khan Nets hi Milwaukee Bucks lakah 124-118 in an chak lo, tun hnaiah a zawnin match thum an tlawm ta.

Nimin zing NBA regular season inkhelah Bucks tan Giannis Antetokounmpo-a'n point 36 a hmu a, rebounds vawi 12 la bawkin a team a chak pui - Milwaukee hian Nets nen an intawn hnuhnung pahnihah hnehna an chang ve ve ta a ni.

NBA champion tum Nets thiampuipa Durant (32 points) leh Irving (38) te an khel chhe lo, mahse player dang zingah anmahni thlawp theitu an awm lo a, quarter li an khelh zinga pathumah an hniam zawk avangin an chak lo hi a mak hran lo.

Inkhel dangah Stephen Curry-a'n point 37 zet nei mah se hnehna chan nan a tawk zo lo a, nimin zing khan Warriors hi Oklahoma City thunder lakah 99-103 in an chak lo - an tan playoff dinhmun a chiang lo chhunzawm.

Western Conference table-ah GSW hi pariatna an ni mek, tuna an dinhmun hi playoff khel tur chin a ni. Mahse, an hnuaia awm Memphis Grizzlies aiin an khel hnem zawk a, an hma hun hi an kutah a innghat vek bik lo tihna a ni.