Javi Martinez-a'n Bayern chhuahsan dawn

Spanish midfielder Javi Martinez chuan season tawpah Bayern Munich a chhuahsan dawn. Kum 32 mi midfielder Martinez hi a club hlui Athletic Bilbao manager Marcelino Garcia Toral chuan laklet a duh niin sawi a awm a; Italy, Japan leh United States aṭangin sawmna a dawng bawk.

Defensive midfielder leh centre back-a chhawr kawp theih Martinez hi Athletic Bilbao aṭangin khawvel huapin a rawn lar chhuak a, Bavarians hian 2010 FIFA World Cup champion team zinga mi Martinez hi kum 2012 khan a buyout clause euro maktaduai 40-in an la chhuak.

Martinez hian Bayern hi Bundesliga nomawi vawi riat a chawi a, tun season-ah an chawi leh dawn bawk avangin kum kua chhungin league nomawi a chawi vek dawn tihna a ni. Bilbao midfielder hlui hi DFB Pokal-a vawi nga a champion bakah Champions League, FIFA World Cup leh UEFA Super Cup vawi hnih ṭheuh a champion bawk.

Spanish midfielder Martinez hi Bundesliga-a match 100 chuang khel zingah chak percentage nei sang ber a ni a, Bavarians tana a inlan 82% ah hnehna a chang.