Monaco GP entu an awm dawn

May 23 hian Formula 1 Monaco Grand Prix tlan a ni dawn a, car intlansiakna sang ber hi a hmunah entu fans an awm thei dawn. Tlan kawnga mipui ṭhutna khat tlat chuan an awm thei dawn lo thung a, mipui leng zat aṭanga 40% an lut thei ang.

Inelna tak neih hmain ni hnih chhung qualifying tlan a ni dawn, heng hunah pawh hian entu an awm thei ang. F1 en tur erawh chuan hri lakah an fihlim a ni tih a chian a ngai, an en hma darkar 72 liam hma ngeia PCR hmangin coronavirus lakah an fihlim tih an finfiah a ngai dawn.

Pathianni hian Spanish Grand Prix tlan a ni dawn a, hetah pawh hian a hmunah mi 1000 an luh theih tur thu tih chian a ni tawh. March thla khan season khuhhawnna Bahrain GP an tlan ṭum khan a hmunah mi 4,500 in an lo en tawh bawk.