Real vs Inter: Thih leh dam kar?

Football ngainatute tan zaninah men reina tur a awm dawn - dar 1:30 hian Champions League group stage-ah Real Madrid chuan Inter Milan an mikhual dawn a, team pahnih inkhel tur hi 'thih leh dam kar' tia sawi theih a ni. 

Champions League draw neih a nih kha chuan group B aṭangin Real leh Inter chu tling chiang saa dah an ni a, mahse he group-a an awmpui Shakhtar Donetsk leh Borussia Monchengladbach-ten ngaihdan dang an lo nei thung. 

Ukrainian club Shakhtar hian match hnih aṭanga point li neiin group hma an hruai mek a, point hnih ve ve neiin Gladbach leh Inter-ten an dawt a, Real erawh point khat nen a mawng lam luah lumtu an ni - zanin dar 11:25-ah Shakhtar leh Gladbach hi an inkhel dawn bawk. 

Real leh Inter-in round of 16 lut tur chuan zaninah chak an mamawh tih a lang chiang a, November 25-ah an intum leh dawn bawk avangin an pahnih inkhel aṭanga point ruk hlawhtu zawk hi chu knockout round lut anga sawi a rem ang. 

Antonio Conte-a'n season hmasaah a duh ang sum hman tur a nei chungin Inter Milan chu Serie A-ah pahnihna a nihpui a, Europa League-ah final lut mah se Sevilla ngam loin an tlawm bawk. 

Italian coach hi chhuak mai tur anga sawi thawm a awm hman hial a, mahse club thuneitute nen an indawr hnuin a rilru a thlak - fan-ten beiseina sang tak nen an thlir zui. 

Mahse, Conte hnuaiah Inter-in beisei angin season bul an ṭan lo. Serie A match ruk an khelh tawhah vawi thum chiah an la chak a, vawi hnih an khingpui inhnehtawkpuiin vawi khat an tlawm. 

Serie A table-ah parukna dinhmun an luah mek a, inelna hrang hranga an match hnuhnung parukah vawi khat chiah an chak - zaninah Real an ngam lo a nih chuan Conte dinhmun a derthawng ṭan ang. 

Conte lungngaihna belhchhah turin striker chhuanvawr  Romelu Lukaku chu zaninah a inkhelh theih a rinawm loh a, he thu buatsaih lai hian thuchiang a la awm lo thung.

Italian chanchinbu lar Corriere dello Sport erawhin Lukaku inlan theih loh tur thu hi huai takin an ziak tawh a, Inter fans tan thu hriat nuam a ni lo ang - Lukaku hi inlan thei ngat se chu a hmachhawn tur Real keeper Thibaut Courtois hi Belgium tana a khelhpui a ni a, Inter-ah ani aia Courtois hrechiang tur an awm lo. 

Inter lamin Lukaku an mamawhzia hriain chhawr hram an duh a, amahin training an neihtir - mahse mahnia training a neih chuan inlan a hlat rih tihna a ni a, Lautaro Martinez leh Alexis Sanchez tan mawhphurhna a sang sawt ang. 

Tun season-ah Lukaku hian Inter tan match sarih khelin goal sarih a khung tawh a, an team-a amah hnaih bertu Martínez hian match riatah goal thum a khung tawh thung - Sanchez-a'n tun season-ah goal khung a la nei lo. 

Tun season-a team hriatthiam har tak chu Real Madrid an ni - Shakhtar laka 3-2 a an tlawm hnu lawkah El Clasico khelin Barcelona chu 3-1 in an hneh a, an boruak a ṭha dawn chauh tihah Gladbach chu 2-2 in an inhnehtawkpui zui!

La Liga-a an match hnuhnung berah Huesca chu 4-1 in an sawp a, an inkhel hnuhnung ber aṭanga teh tur a nih chuan, "Real an insiamṭha tawh," tiin a sawi theih a, mahse sawi tawh angin he team hi hriatthiam har ber pawl an ni hial ang. 

Huesca laka an khelh dan enin Zidane hian Inter hmachhawn turin a team a khek tih a lang a, Raphael Varane leh Toni Kroos chu Heusca lakah hian bench-ah a dah.

Lucas Vazquez, Federico Valverde, Eden Hazard, Marco Asensio leh Casemiro-ten inkhel bul an ṭan vek chungin a la chhuak vek bawk a, Zidane-a'n Inter lakah tih mai mai a tum lo tih a lang -  Vazquez bik hi hliam vanga lakchhuah a ni a, Inter a hmachhawn theih loha a hmun ruak luah turin Ferland Mendy a awm. 

Zidane-a lawmna

Zinedine Zidane-a'n nipui transfer-ah player lakluh a nei lo a, a squad neih sa a ring. Mahse, French coach vanduaina turin Eden Hazard chuan hliam vangin bul a ṭan thei lo a, striker rinrawl Karim Benzema-a'n season hmasa a phak lo bawk. 

Mahse, Gladbach laka an hnufual laiin bench aṭangin Hazard luhtir a ni a, Belgian forward luh hnuah an game danglam zuiin point khat an hlawh chhuak thei. 

Huesca lakah a dam chiang tawh tih lantirin Hazard hi bul ṭantir a ni a, goal a khung zui bawk. Chelsea forward hlui hian London club-a a theihna ang kha a pholang leh thei a nih chuan ṭhatpui tham a ni tih a chiang a, Inter tan ven bik a sual lo ang. 

Benzema pawhin ngai a awh chho leh tawh tih pholangin Huesca lakah goal hnih a khung a, kum 24 mi Asensio a la awm cheu bawk avangin Inter tlarhnung tana buaina thlen turin Real hi an ṭha tawk.