Last 16-ah Halep a chak lo

Simona Halep chu Madrid Open last 16-ah vuak tlak a ni. Romanian star hi a inkhelh thiamna hmun clay court-ah ngei mai Elise Mertens chuan 4-6, 7-5, 7-5 in a hneh a, season kal laia tournament a khelh hoah final a la lut lo vek.

Halep hian a match hmasa pahnihah chuan set hloh miah loin hnehna a chang. Thawhlehni zanah erawh tihsual a ngah, double faults ringawt pawh vawi 10 a nei a, a service a hum ṭhat tawk loh avangin a vanduai zawkah a ṭang.

Mertens hian quarterfinal-ah chuan seeded pasarihna Aryna Sabalenka a hmachhawn ang. Sabalenka hian inkhel dangah American player Jessica Pegula chu minute 52 chhungin 6-1, 6-2 in a lo hneh ve thung.

Quarterfinal dangah world number 1 Ashleigh Barty leh seeded pakuana Petra Kvitova an inkhel dawn, seeded pariatna Belinda Bencic leh Spanish nula Paula Badosa te pawhin semifinal luh an inchuh ve dawn bawk.