Thiem a chak nuamsa

Dominic Thiem-a'n beisei angin season bul a ṭan fuh lo a, mah se Madrid Open an khelh meuh chuan player ṭha tak a ni tih a lantir leh ta. Austrian star hian Thawhlehni zan khan Marcos Giron hnehin third round a lut.

Doha leh Dubai Open-ah Thiem-a'n beisei a phak lo, tournament a khelh ṭhat tawk loh avangin a chawl deuh reng - March thla hnuah tun ṭum hi tournament a khelh leh hmasak ber a ni hial.

Seeded pathumna Thiem-a'n Giron lakah a tir aṭanga a tawp thlengin inkhel a thunun a, 6-1, 6-3 in hnehna a chang. US Open champion hian a match lehpek atan zanin hian Alexde Minaur a hmachhawn zui dawn a, chak tura rinkai a ni ang.

Kum 27 mi Thiem chuan, "Player dangte angin ṭhat fal bikna ka nei ve lo, hnehna chang tur chuan inkhelah 100% rilru ka pek tawp mai hi a ngai ṭhin. Australian Open bakah Doha leh Dubai lama ka result ṭha lo ang khan min kalsan ngei ka beisei," tiin a sawi.

Inkhel dangah Andrey Rublev chuan Tommy Paul 6-7 (5), 6-3, 6-4 in a hneh a, player langsar zinga mi Kei Nishikori pawhin Karen Khachanov lakah 6-7 (6), 6-2, 6-2 in hnehna a lo chang ve bawk.

Mipa singles match dangah Matteo Berrettini, Albert Ramos-Vinolas leh Casper Ruud te pawhin an khingpui ṭheuh an hneh.