IPL-a khel foreign player-te an buai

Thawhlehni khan tiam chin awm loin Indian Premier League chu tihtawp rih a ni a, IPL-a khel foreign player-te haw dan turah BCCI a buai hle.

IPL chuan, "Player-te anmahni ram ṭheuh him taka an thlen theih nan BCCI chuan a theihna zawng zawng a chhuah ang," tiin player-te an hnem.

Mahse maw!
Covid-19 vangin India a buai a, hri leng kai an tam thar bakah thi pawh an tam hle. Khawvel ram dangin India ram puih dan zawng mah se 'Hamara Desh' hi an thin hrik ta hle.

Australia chuan May 15 thleng India ram aṭanga an rama luh a khap. Tunah hian IPL khelh vanga India rama awm Australian player 38 zet an la awm a, BCCI-in an thlawh hawna tur buaipui inhuam vek mah se Australia sorkar-in India ram aṭanga haw a khap bur.

India ram ṭanga Australia rama luh luih chu pawisa chawi tir emaw jail-a dah emaw theih a ni a, Australia tihmingṭha tawhtu cricketer-te pawh inhriatthiamna a awm lo. Tuna buaina hi pumpelh turin Australian mi pathum Adam Zampa, Kane Richardson leh Andrew Tye te chu April thla tawp lam khan an ramah an haw.

Australian bowler Pat Cummins chuan, "Ni 14 inkhung hran hi chu contract kan ziah pawha kan hriat sa a ni a, amaherawhchu ram intlawh pawh phal loh hi chu kan la tawn ngai loh a ni. Chutihrualin June thla thleng contract kan ziah a ngaih avangin kan contract kan zah a ngai a, May 15-ah kan ramah kan let theih kan beisei," tiin a sawi.

India ramah Covid-19 vei an pun zel avangin Australian cricketer, coach leh commenatator-te hi Sri Lanka emaw Maldives emawah an rama an haw theih hma chu an awm rih thei bawk.

Engtin zel?
Cricket South Africa (CSA) chuan, "South Africa rawn let tur zawng zawngte WHO dan angin khung hran vek an ni dawn. CSA leh South Africa Cricketers' Association ten player zawng zawng kan be pawp vek a, an awmna ṭheuha him tak leh ngaih ngam taka an awm theih nan theihtawp kan chhuah a ni," tiin thuchhuah an siam.

Ram hrang hrang sorkar kalphung a inan loh avangin BCCI-in ruahmanna hran ṭheuh a kalpui a ṭul a, hei chauh ni loin ram khat player-te hi team hrangah vek an khelh avangin an haw ho theih dan tur ngaihtuaha ruahmanna ṭha taka duan a ngai bawk.

Tun dinhmunah IPL khelh chhunzawm leh dan tur ngaihtuah theih a la ni lo a, IPL khel foreigner-te him taka an haw dan tur chu ngaihtuah hmasak a ngai ta zawk.