Saul vs Saunders-a chiang lo

Boxing ngainatute nghahhlelh, Pathianni zinga Saul 'Canelo' Alvarez leh Billy Joe Saunders inhnek tur chu Saunders-a team lamin buaina an neih avangin a thleng thei lo mai thei.

May 8 zan, keini lam sanaa Pathianni zing dar 8:30 bawr velah boxer pahnih hi inhnek tura tih an ni a, he an inhnek tur atana media an hmachhawn hmasak ber turah Billy Joe Saunders hi a inlan lo.

Boxer pahnih inhnekna tur atan hian ft 20-a zau ring chu ruahman a ni a, Saunders-a team lam chuan hei hi a zim lutuk tiin an duh lo a ni.

Saunders-a pa Tom Saunders chuan, "Fan-te hnenah ngaihdam kan dil a, ft 20 leka zau ring chhungah ka fapa hi ka inhnektir thei lo," a ti a, "24ft ring kan duh a, mahse ft 22 pawh kan pawm thei. Heti chung hian 20ft ring-a inhnek kan duh loh chuan haw mai tura hrilh kan ni," tiin a lawm lo hle.

Kum 31 mi Saunders-a thiamna pakhat chu a ke a hmang thiam leh a movement ṭha hi a ni a, ring-a zim chuan British boxer hian a thiam bikna hi a beisei angin a hmang thei dawn lo tihna a ni.

Mahse, Alvarez chuan, "Ring len zawng hian minti buai lo. Ka lut ang a, ka hna chu ka thawk mai ang. Saunders hian hei chauh hi chhuanlam a siam lo a, chhuanlam tam tak a nei tawh a ni," tiin a khingpui tur chu amah pumpelhna tur zawngah a puh.

Saunders hian Alvarez thusawi hi instagram lamah pholang nghalin, "Kan buaina chinfel a ni ta chu ka lawm hle mai," a ti a, mahse, he thu buatsaih lai thleng hian boxer pahnih inremna hi hriat tur a la awm lo.

Boxer pahnih hi ruahman anga an intawng thei dawn a nih chuan AT&T Stadium, Arlington, Texas-a inhnek tur an ni a, Texas Department for Licensing and Regulation chuan boxing ring chu, "16ft aiin a te tur a ni lo a, 32ft aiin a lian tur a ni lo," tiin an ziak.

Tun hi boxing khawvela fight lian thama ring chungchanga fighter an intihbuaina hmasa ber a ni lo. Kum 2015-a Tyson Fury-a'n Wladimir Klitschko-a hneh ṭum khan Fury-a team-te chuan ring chhuat hnuai lama an thil phah chuan Fury movement-a tibuai theiah ngaiin an lo duh lo tawh a, laksawn a ni nghe nghe.

Vawi 30 inhnek a hmachhawna tlawm la nei lo Saunders hian WBO world super-middleweight title-a kawl mek a, vawi 58 inhnek a hmachhawna Floyd Mayweather ngam loa vawi khat tlawm tawh Alvarez hian WBA leh WBC title-a kawl thung.

Boxer pahnih hi an inrem a, ruahman anga an inhnek thei a nih chuan super-middleweight world title pali zinga pathum an inchuh dawn tihna a ni a, a en tlak viau ang.