Man United hna a harsa tawh lo
Manchester United chuan zanin dar 12:30 hian Stadio Olimpico-ah AS Roma an hmachhawn dawn. Europa League semifinal first leg-ah Ole Gunnar Solskjaer-a hote 6-2 ngawt a an chak tawh avangin English club tan hna harsa a awm tawh lo.
Roma hi Man United laka an mualpho hnuah an la insiam ṭha thei lo a, kartawp Serie A inkhelah Sampdoria 2-0 in an hneh lo. Italian club thuneituten Paulo Fonseca chungah rinna an nghat ngam tawh lo a, season thar aṭangin United manager hlui Jose Mourinho-a'n team a enkawl ang.
Khawvel manager ropui ber zinga mi Mourinho an lakluh avangin Rome mipui an lawm a, amaherawhchu an lawmna hi season thara mi tur daih a ni. Zaninah erawh 6-2 aṭangin thawhchhuah a ngai dawn a, hliam vangin keeper Pau Lopez bakah Leonardo Spinazzola, Jordan Veretout leh Amadou Diawara te an khel thei dawn lo.
Man United erawhin nuam sa takin second leg an khel thei tawh dawn. Solskjaer-a'n hliam vangin Anthony Martial leh Phil Jones te a chhawr thei dawn lo a, a bak zawk an dam ṭha.
Europa League-ah David de Gea a inlan tawh ṭhin avangin a inlan a rinawm a, tlarhnungah tun hnaia contract pawtsei Eric Bailly-a'n chance a pe thei bawk. Premier League lamah match pawimawh la awm tho avangin Bruno Fernandes leh Mason Greenwood te pawh hahdam thei dinhmunah an ding.
Chutihrualin Man United hian first leg hmaa thil thleng an theihnghilh lo ang. Solskjaer-a'n Roma hi, "Tute nge an nih ka hre lo," a tih avangin Roma fan an lungawi lo a, England an zin hma pawhin supporter ṭhahnem takin, "Tute nge kan nih chu hriattir ru," tia chahin an player-te hi an thlah liam.
Amaherawhchu Old Trafford-ah Roma an mualpho a, langsar takin pawr nawn ngam tawh lo mah se an rilru hliam erawh thawi dam a la ni lo. Italian club hian semifinal an thleng zo lo a nih pawhin an mual Stadio Olimpico-a Man United hneh let ngei an duh dawn a ni.
Europa League
Semifinal
First leg - April 29, Ningani
Manchester United 6 - 2 AS Roma
MAN : Bruno Fernandes 9', 71' (P); Edinson Cavani 48', 64'; Paul Pogba 75'; Mason Greenwood 86'
ROM : Lorenzo Pellegrini 15' (P); Edin Dzeko 33'
Villarreal 2 - 1 Arsenal
VIL : Manu Trigueros 5'; Raul Albiol 29'
ARS : Nicolas Pepe 73' (P)
Second leg - Zanin Inkhel Tur
Roma 12:30 AM Manchester United
Arsenal 12:30 AM Villarreal
Final - May 26, 2021