The Special One a lo kir e - Roma coach thar Mourinho

Mi tam tak hna zawnga an buai laiin Jose Mourinho erawh a buai ve lo - hnain a zawng zawk! Tottenham Hotspur-in an banna lehkha ziak pawh a chul hmain Portuguese coach hian hna a hmu leh nghal a, AS Roma coach a ni dawn.

Chelsea legend Mourinho hian season tawpa chhuak tur Roma coach Paulo Fonseca a thlak dawn a, Serie A club-ah hian kum thum chhung cham turin contract-a ziak a ni. Mourinho chuan, "Roma fan-ten he club leh football an tuipuizia ka hmu a, chuvang chuan he sawmna hi kan hnar phal lo a ni. Season thar ka nghakhlel tawh hle," tiin a sawi.

Roma-in Mourinho an lakluh thu puan a nih rual hian football atchilhna khawpui Rome mipuite titi ber chu Mourinho-a ni nghal a, social media, television leh radio-ten khaw dang an hawi thei lo, an ti!

Mikhual aiah legend
Kum 58 mi Mourinho hi Italy-ah a mikhual lo. June, 2008 - May, 2010 inkar khan Inter Milan-a lo enkawl tawh a, season hnih a cham chhungin Italian football-a nomawi chawi theih chu a chawi kim vek!

Season hnih a zawnin Serie A-ah a champion pui a, Coppa Italia (1) leh Supercoppa Italiana (1) ah nomawi a chawi ve ve a, 2009-10 season khan Champions League-ah nomawi chawi telin Inter hi treble champion a nihpui.

Real Madrid enkawl tura Inter-a chhuahsan hnuah Serie A club hian zuih lam an pan a, Mourinho kaihhruaina hnuaia league nomawi an chawi hnua a vawi khat nan tun season-ah Antonio Conte hoin an champion ve leh chiah - hei hi Serie A tingaihnawmtu tur a ni.

Conte hian Chelsea-ah Mourinho-a lo thlak tawh a, Portuguese manager hian Blues-a chhuahsan hnuah Manchester United-a pan thung. Coach pahnih hi ṭawngkamin an inbei fo a, mual sir lama an intawn ṭumin an ṭhu hle hle ngai lo bawk - Serie A lamah hei hi kan hmu leh dawn tihna a ni a, Italian football-in ngaihven a hlawh thar dawn.

Hmachhawp chu

Kum 2004 Champions League-a Porto-a champion pui hnuah Mourinho hian club langsar leh sum ngah hlir a pan a, player ṭha an kawl nual sa ṭhin bakah bazar-na tur sum an pe hnem ṭhin hle.

Roma-ah erawh a danglam dawn - club neitu Dan Friedkin leh sporting director Tiago Pinto-ten sum hman tur a tam loh thu an sawi chiang a, Mourinho tan player lalut tura tih tur pawimawh chu a neih sa hralh ṭhena, sum siam a ni mai.

Kum 35 mi Edin Dzeko-a'n nipui transfer-a a contract-a hman zawh dawn avangin a chhuak dawn nia sawi a ni a, Manchester United-a Mourinho-a chhawr duh loh hnu Henrikh Mkhitaryan leh Chris Smalling dinhmun pawh a nghing nghala ngaih a ni.

Roma hian player ṭhangduang tak tak defender Gianluca Mancini leh Marash Kumbulla, midfielder Jordan Veretout leh Gonzalo Villar, captain Lorenzo Pellegrini leh attacking midfielder Nicolo Zaniolo-te ho an nei tih erawh hriat a ṭha a, Mourinho-a'n anni behchhan hian team a din ang.

Mourinho-a'n engzat nge a hlawh dawn?
Khawvela coach ropui ber pawl a ni a, a kalna hmun apiangah Mou hi khawvela coach hlawh hnem pawl a ni zel - football khawvelin sum lama Roma ropui bik lohzia a hai lo a, Mourinho hlawh tur zat an inrinsiak.
Italian media-ten an tarlan dan chuan Mourinho hian kum khatah euro maktaduai sarih a hlawh dawn a, Tottenham Hotspur-ah khan kum khatah euro maktaduai 16-a hlawh nia sawi a ni - a inthlau vet vet hle.

Mahse, Mourinho hian a hlawh ngawr ngawr piahah hian Italy a pan avangin a sum hloh tur a hum thei. Italy-ah hian 'growth decree' dan hman a ni a, he dan hnuaiah hian Italy-a tun hnai kum thum chhung cheng lo chu ram pawn aṭanga an sum lakluha an chhiah chawi turah 50% awl tur an ni.

Portuguese manager hian sponsorship leh thil dang aṭangin sum lakluhna a nei nual a, heta ṭang hian 50% bak chhiah a pe dawn lo tihna a ni. Hetihlai hian English media ṭhenkhat chuan Mourinho hian club-a neih tak avangin Spurs aṭanga a hlawh lak bang, club-a hmuh hmaa a lak tur chu a la thei dawn lo niin tarlang mah se Mou hian Spurs aṭangin hlawh a la dawn tho niin a lang.

Spurs-in Mourinho an ban khan, a contract zawh hmaa club-a hmuh pawhin, Spurs-in a club thara a hlawh lak chuan London club-a a hlawh a phak lo a nih chuan a phak lohna zawng an pek tur thuin an tiam.
Chumi awmzia chu Italian media-ten an tarlan angin Mou hian Roma-ah euro maktaduai sarih a hlawh a nih chuan Spurs-a a hlawh a phak lohna, euro maktaduai kua chu London club hian an la pe dawn tho tihna a ni - kum khat atan chauh a ni thung.

A tawi zawnga sawi chuan Mourinho hian Spurs-a a hlawh lak zat a phak lo viau angin lang mah se chhiah a awl turte leh Spurs aṭanga a sum dawn turte ngaihtuah chuan a hlawh tlakhniamna hi a tam lo.

"Friedkin chhungkua ten he club enkawl tura min rin tawk avangin lawmthu ka sawi a, club neitute leh Pinto nena kan inkawm hnu khan an hmachhawpte chu ka hrethiam vek - keimah ngei pawh ka infuih phurna ṭhin ang khan tum sang tak an nei a, anni nena thawk hoin team ṭhangduang tak din kan tum a ni." - Jose Mourinho

"Jose-a awl tih kan hriat khan khawvela coach ṭha ber pawl be turin hun kan khawhral lo. He game-a hmangaihna leh a chak duhna thinlung hian min hneh a, nomawi tam tak a chawi tawh chungin chawi belh zel a la duh a ni. Eng level-ah pawh inelna hmachhawn turin a hriatna a zau a, tawnhriat a nei ṭhain min kaihhruai a thiam hle. Kan hmachhawp thlirin Jose kan thlang hi kan tisual lo ang tih ka ring a, tun leh nakin hun atana mi famkim chu a ni hi a ni. - Tiago Pinto, Roma sporting director