Vienna Open champion Rublev

Andrey Rublev chuan season kal laia a nomawi pangana ni turin Vienna Open title a la, seeded pariatna hian final inkhel hmuhnawm takah Lorenzo Sonego chu 6-4, 6-4 in a hneh.

Russian tlangval Rublev hian tournament a khelh hnuhnung pali zinga pathumah hlawhtlinna a chang thei, tennis a khelh hun chhungin final a luh vawi sarih zinga vawi ngaah hnehna a chang thei hial.

Austria khawpuia inelna hi 'Erste Bank Open' tia sawi a ni bawk a, champion Rublev hian final kalkawngah nomawi kawl mektu leh tualchhung tlangval chhuanvawr ni bawk Dominic Thiem chu a hneh bawk a ni.

Kum 23 mi Rublev chuan, "Austria ramah hian engmah hloh leh chuang tur nei loin ka kal a, engthawl leh nuamti taka inkhel chungin hlawhtlinna ka chang thei hi ka lawm takzet.

"Ka pi hi Austria rama piang a ni a, kei pawh hi Austrian thisen kai ka ni tihna a ni. He ramah hian ka mikhual lo, season dangah pawh ṭha taka khelh chhunzawm leh theih ka beisei," a ti.

Tun season inelna lian US Open leh French Open-ah te khan Rublev hian quarterfinal a lut ve ve a, hri leng vanga harsatna hrang hrang a thlen karah pawh atan chuan lawmna tur a tam viau.