Inkhel turin ka inpeih - Nadal

Rafael Nadal chuan a vawi 13 nana French Open nomawi a chawi hnuah inelna a hmachhawn leh dawn a, tunkar chhunga khelh tur 2020 Rolex Paris Masters atan a inpeih thu a sawi chhuak.

Inelna hi Roland Garros ang bawkin Paris khawpuia khelh tur a ni, mahse clay court ni loin hard court chunga khelh a nih avangin Nadal tan hmun ṭha a ni lem lo, vawi sarih a inlanah quarterfinal lut vek mah se nomawi a la chawi lo.

Spanish tlangval Nadal chuan, "Theihtawp ka chhuah dawn, tun hmain beisei phak lo ṭhin mah ila kuminah chuan engkim thil thar ang veka ngaiin hlawhtlin theih ngei ka inring.

"Hri leng vangin thla ruk chhung vel tennis kan khel thei lo kha a ni a, chumi hnuah inelna kan hmachhawn leh thei chauh. Season tawp lamah hian a tam thei ang ber tournament khelh ka duh a ni," tiin a sawi.

Paris Masters-ah hian champion lai Novak Djokovic chu a inlan dawn lo a, US Open champion Dominic Thiem a inhnuhdawh leh bawk avangin Nadal tan nomawi chawi theihna kawng a inhawng zau viau dawn niin a lang.